Lirnghingin Indonesia-a West Java thliarkar tlangram a sawi hnu leh vawi tam tak nghing nawn a awm leh hnuah chhanchhuah hna thawktute chuan dam chhuak zawn hna an thawh chhunzawm zel.
West Java Governor Ridwan Kamil chuan Thawhtannia a nghin hnuah khan vawi 140 vel aftershock a awm tawh thu a sawi.
Naupang thahnem tak telin mi 268 thi an awm tawh a, mi 151 vel chin hriat loh la awmin mi 1,000 chuang an hliam.
A nghin tanna hmun, Cianjur-ah chhanchhuah hna thawktu mi za rual fe tirh luh an ni tawh a; mahse, nghing nawn leh kawng chhia a tam em avangin an duh angin an thawk chak thei lo.
Kamil chuan BBC Newsday programme-ah tual chhung mite chu aftershock avang hian an la hlauthawng a, puitute tan pawh chet a har tih a sawi.
Aftershock hi Friday-ah chuan a reh fel tawh a beiseiawm tih a sawi a. “Tunah chuan mi zawn leh chhanchhuah kan thupui ber a, tlangram kilkhawr leh tlang chhipah mi tam tak chin hriat loh an la awm a ni,” a ti.
Kamil chuan kawngpui a hman theih loh nasat avangin chhanchhuah hna thawktute ke leh motorbike-in an thawk chhuak tih a sawi a, mi phurh ngai an awm thuta che turin helicopter an inring bawk.
Magnitude 5.6-a na lirnghing hian mihring chen tamna lai bial hi Thawhtanni chhun chaw fak lai velin a sawi a, in tam tak a chim a. In chung leh bang chimin a delh mi tam tak an tang a, sikul 80 chuang zet khawihin naupang an thih nasat phah niin thuneitute chuan an sawi.
“Chhun dar 1:00 vel a ni a, sikul kai hun lai a nih avangin naupang an tam phah,” tiin National Search & Rescue Agency hotu, Henri Alfiandi chuan a sawi.
Lirnghing avang hian mi 58,000 chuang hmun hima suan chhuah niin an awmna tur hmun tam takah siam a ni tih governor chuan a sawi a. National Disaster Mitigation Agency chuan in 22,000 vel a chhia niin a sawi.
Tlangram, West Java velah chuan lirnghing hian lei min siamin khaw thenkhat phei chu a khaw puma a chhilhte pawh a awm.
President Joko Widodo chuan chhiatna thlenna hmun hi Thawhlehni khan tlawhin chhanchhuah hna thawktute nen pawh an inkawm tih thlalakah hmuh theih a ni.
“In leh thil chim kara tangte lak chhuah chu hna hmasaa nei turin ka hrilh,” a ti a. A tuartute chu zangnadawmna an pek tur thu a sawi bawk.
Governor Kamil chuan sorkarin in chhiate chu a siam that tur thu a sawi a, ‘hmun derthawng’ laia chengte pawh an awmna hmasa hmuna in sa tawh lo turin an hrilh tih a sawi.
Indonesia hi Pacific Ocean-a tectonic plate che reng chunga awm a ni a, an awmna lai hi a chet nasat avangin ‘ring of fire’ tih niin lirnghing an tuar zing hle.
An ram hian khawvel huapa lirnghing leh tsunami na leh lian ber ber an lo tuar tawh thin a, kum 2018-a Sulawesi thliarkara linghingah phei chuan mi 2,000 chuang thi an awm.