Union Minister of State Ashwini Kumar Choubey chuan FCI kudam lian zawk sakna tur leh tuialhthei dah khawlna tur, oil depot hmun tur Mizoram sorkarin ram a neih phawt chuan central sorkarin eng hunah pawh a sakna tur an pe thei tih a sawi.
He thu hi nimin BJP Mizoram Pradesh Office, Upper Republic, Aizawla chanchinbumite a kawmnaah a sawi a. Union minister chuan kudam leh oil depot siamna tura sum sorkar laipui a pek theih thu hi nimin zinga chief minister leh larsap nen an inkawmnaah pawh a sawi chhuak tih a sawi.
Union minister chuan chief minister hian a hnenah Mizorama mau tharte lak chhuahna tur, Bamboo Tissue Culture Laboratory din a mamawh thu a lo thlen thu sawiin, “Mizoram mamawh a sawite zir chiang turin central atangin mi thiam rawn tirh kan tum,” a ti.
Choubey chuan Mizoram a rawn thlen hlimah Supply Minister K Lalrinliana nen airport-ah an inhmuh thu leh hetah hian central sorkarin ei leh bar phurhna man bill kum 20 a lo batsak tawh chu pek vat a nih theih nana hma laksak turin a lo ngen tih sawiin, Delhi-a official-te a be nghal a, bill ba zawng zawng atanga zaa 80 chu pek tlak a lo ni tawh a, a bak zaa 20 la awm chu December 15 hmain pek tlak a ni dawn tih a sawi.
PM-DIVINE chungchang sawi bawkin, heta sum dahte a rang lama hai chhuah vat a nih theih nana DPR-te siam turin state sorkar hotute a hrilh thu te, prime minister-in a ngaih pawimawh ber chu central atanga sum lo kalte hian mipuite a thleng em tih chu a hriat duh leh a ngaihven a nih thu a sawi bakah hemi kawngah hian BJP hotute leh thuthar thehdarhtute chu beng chhi turin a chah a ni.
Sorkar laipuia Environment, Forest & Climate change leh Consumer Affairs, Food & Public Distribution chuangtu union minister chuan Mizoram hmasawnna chu an duh a, chuvang chuan an rawn tlawh leh fo dawn tih sawiin, state chhung a mi tinten hlawkna an chan theuh theih nan hma an la zel dawn tih a sawi bakah prime minister scheme hrang hrangte chu mi tinin a taka an chan ngei an duh thu a sawi bawk a ni.`