Aizawl :  Kolasibah District Horticulture Office leh Kolasib District Florist Association buatsaih Flower Show chu nimin khan DC Circuit House, Kolasib-ah Kolasib Bawrhsap John LT Sanga’n a hawng.
Bawrhsap chuan hmunhma tinuam leh timawizualtute zinga pawimawh ber chu pangpar nia sawiin, pangpar mawi taka khawi tur chuan dawhtheihna, taimakna leh remhriatna neih a tul thu a sawi a. Mihring ina chhungril a kan rilru put hmang tih lan nan pangpar mawi tak tak kan hmang thin hian pangpar hlutna a tichiang hle a ni, a ti.
Ni thum awh tur Flower Show hian Kolasib khaw chhunga pangpar khawituteah phurna thar a thlen ngei a beisei thu Kolasib Bawrhsap chuan a sawi a. Kolasib khaw chhung timawi lehzual tura hmaraw tangkai tak ni turin duhsakna a hlan bawk.
Kolasib District Florist Association Secretary report-a a lan danin Kolasibah Florist member 140 an awm mek a, khawchhung chei mawi nan Saron pangpar uar zawka phun turin hma an la mek. Flower Show-ah hian florist 18-in pangpar chi hrang hrang en tur leh lei theih in an chhawp chhuak a ni.