Saudi Arabia in an ram football chanchin a an huntawn ropui ber ti a chhal ngam an thleng a. 2022 World Cup a an group match hmasa berah Argentina 2-1 in an hneh.
Lusail Iconic Stadiumah World Cup chanchin a inbarakhaihna lian ber zing ami hi a thleng a. Khawvela player tha ber a ngaih Lionel Messi leh a hnampuite hi an chesual a ni satliah lo. Saudi player-ten hnehna chan phu takin football an lakah an khel.
World rankings a 51-na ni mek Saudi hi first half enin an rethei dawn hle niin a lang hman. Penalty atangin minute 10-ah Messi-a’n goal hmahruai a khung a. Argentina in ball hlauhawm inpe thei fo mahse Saudi offside trap avangin tum thum an goal khung a offside.
Second half-ah erawh engkim a danglam. Saudi an huaisen a, Argentina an tlahniam thung.
Minute 48-naah Saleh Al Shehri chuan defender tihsual nei ve thei tak Cristian Romero chu a chetsual tir a, goal tha khungin si phurh a sut.
Saudi phur sawtin Salem Al Dawsari chuan an chakna goal ni tur mawi takin a khung.
An tlawm avangin Lionel Scaloni pawlte hi a zawna vawi 36 tlawm lova an kal lai chu a tawp a. Inrinni zanah Mexico lakah chak ngei an mamawh tawh.
Saudi an fakawm
Team pahnih inkhel enin a thiam zawk an chiang, player malkhai a talent nei tha zawk an hmuh theih. Argentina in ball tha tak tak an inpe fo thei. Mahse paltlang theih loh chin an nei tlat.
Coach Hervé Renard-a’n a tlarhnung nghet takin a rem a, an goal atanga hma takah remin offside trap an siam chu an ti fuh.
Thahrui an ngah chu muallaiah an hmang tangkai bawk a. An tlarhnung remna a hma avangin defense leh midfield inkar a zim a. ‘High press’ dik tak khelin Argentina in a ‘final pass’ han tih dik an harsat.
La Albiceleste tlarhmaah Messi leh Lautaro Martinez te an khelchhe lo, mahse Saudi tlarhnung thiat tura puitu an nei tha tawk lo thin.