World champion ni lai France in kuminah pawh an lallukhum chhuhsak turin beih fe a ngai dawn tih an lantir nghal a. Australia laka an thatna lantirin goal li an khung a, 4-1 a chak turin an lehthal.
Thawhlehni zanah France tana goal hnih khungtu striker Olivier Giroud chuan French legend Thierry Henry record tlukin an pahnihin France tana goal khung hnem ber an ni mek.
Hei le, Les Blues
World Cup dawnah player pawimawh inhliam an nei nual a. Player pawimawh leh langsar te an tel avangin France lakah zawhna a awm.
Mahse khawvela player tha ngahtu France in Ballon d’Or dawngtu Karim Benzema, Paul Pogba, N’Golo Kante leh midangte tel lo mahse an buai lo tih an lantir.
Al Janoub Stadium a inkhelah Craig Goodwin chuan Socceroos tan goal hmahruai minute 9-naah a khung a. Beisei loh result an beisei hman.
An beisei ang erawhin thil a kal lo. France in champion lai an nihna an lantir. Minute 27-naah Adrien Rabiot hmangin an si phurh an sut a. Benzema hmun luahtu Giroud-a goal khung tur siamsak leh bawkin second half-ah Kylian Mbappe-a’n an goal thumna khungin Giroud-a’n record tlukna goal a khung ve leh bawk.
Kum 36 mi ni tawh Giroud hi France squad-ah striker rinrawl a ngaih a ni ngai lo chungin inelna lianah hmun pawimawh a chang fo.
Ram tan vawi 115 inkhel tawhin goal 51 a khung tawh a. Qatar-ah hian record siamtu nihna remchang a nei dawn.
Hliam leh bawk
Benzema, Pogba, Kante te bakah Presnel Kimpembe leh Christopher Nkunku te pawh an chhawr thei tawh lo. An defender pawimawh Lucas Hernandez chu minute 13 hnuah a nau Theo Hernandez chuan a thlak a ngai.
Bayern Munich left-back hi a khupah hliam na a neih avangin tun World Cup a khel tawh dawn lova. Zai a ngaih a rinawm avangin kuminah club tan a inkhel leh hman ang em tih zawhna lian tak a awm nghal bawk.
Fimkhur Poland an chak zo lo
Poland in player nei tha zawka ngaih nimahsela hnehna an chang zo lova. Mexico nen goal inpe lovin an inhnehtawk.
Doha a Stadium 974 Robert Lewandowski chuan huntawp dawn lamah penalty an hmuh chu a pet a. Mexico tan World Cup a che tha thei tak veteran goalkeeper Guillermo Ochoa chuan a save sak.
Goal hlauhawm tam lohna inkhelah Poland goalkeeper Wojciech Szczesny chuan Jorge Sanchez leh Hirving Lozano goal khung turte a dansak.
Poland in khawvela striker tha bera tam tak ngaih Lewandowski nei mahse World Cup-ah minute 360 goal a khung tling tawh lova. An squad-ah Juventus striker Arkadiusz Milik leh AC Milan striker thin Krzysztof Piątek te nei bawk mahse an coach a fimkhur tlat avangin goal nawrah an hlauhawm lo.
Group D inkhel dangah Denmark leh Tunisia te Education City Stadium-ah an inkhel a. Goal inpe lovin anni pawh an inhnehtawk.
Offside avanga goal pawm loh an neih ve ve na inkhelah team pahnih inkarah Denmark in chance tha an nei ngun zawk.
Christian Eriksen goal khung tur chu Aymen Dahmen chuan a dansak a, goal ruakah Andreas Cornelius chuan a khung thei lo bawk.