Manchester United chuan Thawhlehni zan khan Portugal forward Cristiano Ronaldo contract chu an tihtawp nghal thu an puang.
Kum 37 mi hian tunhnaiah TalkTV-ah Piers Morgan nen interview neiin a club hi nasa takin a sawisel a. Club manager zahna a neih loh thu a sawi bakah club neitute thleng pawhin a sawisel.
United chuan kar hmasa khan an player chungchang hi engkim an zirchian hnuah hma an lak tur thu an sawi a. Kartawp Ronaldo chungchang an ngaihtuah tur thu an sawi.
United chuan, “Old Trafford a tum hnih hun a hman chhunga a thiltih zawng zawnga kan lawm a. Amah leh a chhungte duhsakna kan hlan.”
“Manchester United a awm zawng zawngte hian Erik ten Hag hnuaia hmalam pan turin ke kan pen chhunzawm zel dawn.” tiin an thlah.
Ronaldo hian kar khat a Pound 500,000 hlawhin thla sarih contract a la nei a. Hengte hi club nena tihtawp inremna an neihah pek tlak a ni dawn lo.
United tan vawi 346 inkhelin goal 145 a khung hman a. Amah nena sawizawm club awm nghal mahse heng zing ami Newcastle United chuan an ngaihven lo tih an sawi.
Glazers pawh?
Manchester United ten hun rei tak chhung an dodal tawh club neitu Glazer chhungkua chuan club hralh an inhawng tih an sawi.
Kum 2005 a Pound maktaduai 790 a United leitu Glazers te hian Man United a than zelna turin club chu hralh emaw, sum chhung lut tur thar zawn emaw kawng dang a hmalak dan tur an dap thu an sawi.
Glazers ten Manchester United chu hralh an phal tih an sawi hnu hian stock market-ah United hlutna chu 17% in a pung a. An hlutna Pound 336 velin a pung nghal niin an sawi.