Aizawl: Thorang bialtu MLA, Zodintluanga Ralte, MPCC Treasurer chuan a bial chhung khaw hrang hrang fan chhunzawm zelin Ningani zan khan Lungsen leh Belthei khuate a tlawh bakah, Putlungasih leh Kauchhuah inkar, Rigid Pavement Road km 3.72-a thui kawng thar lawmna hun a hmanpui bawk.
Kawng hawnnaah hian thu sawiin Zodintluanga Ralte hian Congress party mipuiten kumin hi eptu party nia Krismas an hman hnuhnun ber a nih tur thu a sawi.
Zodintluanga Ralte hian MNF sorkarin mipuite hnen atanga sum an hmuh theih dan tur zah leh mualpho pawh dawn loin kawng hrang hrangin an dap nasa hle nia sawiin, “Mipuite a theihna zawng zawngah min sawrfu a, min sawrfu hneh lutuk a, Mizoram mipuite MNF sorkar lakah hian an beidawng tawh takzet a ni,” a ti.
Congress treasurer hian MNF president leh chief minister ber pawh a minister-te zinga miin mipuite hnenah fiamthu thawh nana hmang tawh lo turin a ngen hial nia sawiin, “Hetianga chief minister fiamthu thawh nana hmang lo tura ngen hi Indian ram khawi hmunah mah a la awm lo,” tiin, chief minister chu a thusawi apiangah mipuiten nuihna tur an zawng mek tawh niin a sawi.
MNF sorkar chu an khawngaihthlak letling tawh zawk tih sawiin Zodintluanga Ralte hian, MNF party mi tam zawkten MNF nih an zak a. An sorkar theihna tur hmanrua atana SEDP-a Rs. nuai thum sem tum kha, Rs. 50,000-ah an tla hniam a, an sem dawn tak taka a lan hunah phei chuan Rs. 25,000-ah an tla hniam leh a. MNF party hruaitu tam zawkin SEDP chungchang sawipui dawnin an beng an dawn tha duh tawh lo niin a sawi bawk.
Congress MLA hian Congress party chuan mipui a tithlawn ngai lo tih a sawi a, kum 2023-a inthlan manifesto atan pawh ‘Tang Puihna’ atan cheng nuaih bi atanga mamawh intawm atana a hman tur a nih phei chuan cheng vaibelchhe tel thlengin tanpuina pek an nih tur thu a sawi a ni.