Aizawl: MNF Adviser TJ Lalnuntluanga, EF&CC minister chuan nimin khan Aizawl-a Mizo Hnam Runah thu sawiin MNF party hi leader tha hnuaia kal a nih avangin ram pawhin nasa takin hma a sawn zel tih a sawi.
Ram siam tha tur chuan leader tha a ngai tih sawiin, “Leader tha hnuai loah chuan dinhmun a sawh ngheh theih loh a, leader tha nei lo chu a tawpah an tluchhe leh nge nge thin a ni. Chuvangin, MNF party pawh hi leader tha hnuaiaah kan kal a, kan ram pawn nasa takin hma a sawn zel,” a ti.
Social media kaltlangin party thenkhatin sorkar hmalak tawhna mipui hriat turin thu dik leh dik lo pawh hre loin an ralrin thuin, a chhe lam hawi zawngin an duh lai lai an thehdarh kual niin a sawi a. Mipuite pawhin thudik a ni em tih hi an hriatfiah a, an finfiah hmasak a tul thu a sawi.
EF&CC minister hian tun hnaia sorkar laipui dawra a zin chungchang sawiin forest clearance kalpui leh hmalak dan kalhmang tifel hma tur te, Forest Research Centre for Bamboo & Rattan (FRCBR), Bethlehem Vengthlang, Aizawl chu Recruitment Exam Centre-a hlang kai tur leh tun aia dinhmun sang leh tha zawka dah tur te, forest department kaltlanga kuthnathawktute puih an nih theihna tur leh, agro forestry lama hma an sawn theih nana Green India Mission (GIM) district tina kalpui tura hmalaksak tur te, ramsa leh sava tawlh ruk mante dahna tur Animal Rescue Centre emaw, Mini Zoo din tura hmalaksak tur te, Forest department hnuaiah Centrally Sponsored Scheme (CSS) atanga Forest Protection Squad dinsak tur te, district hrang hranga Nagar Van Project kalpui tur atana dilna leh rawtna siam theh luh tawh pawmsak tur tein sorkar laipui hotute a ngen tih a sawi.