Xavi Hernandez chuan Barcelona manager anga a trophy hmasa ber a la a. Pathianni zanah Spanish Super Cup final-ah harsatna lian tawk lovin an hmelma Real Madrid an hneh.
Saudi Arabia a King Fahd Stadium a El Clasico-ah hian La Liga hmahruaitu ni lai in inkhel hi an thunun rei zawk a. Kum 18 mi midfielder Gavi chuan minute 33-naah goal hmahruai ni turin Robert Lewandowski siamsak chu goal-ah a khung.
Halftime dawnah Lewandowski chuan an goal hnihna a khung ve leh a. Gavi-a’n a siamsak ve thung.
Second half-ah Gavi bawk a par vul leh a. Midfield a a khelhpui Pedri goal khung tur a siamsak ve leh a. Real Madrid in huntawp dawnah goal khat an khung ve a, French striker Karim Benzema chuan inkhel a goal hnuhnung ber a khung.
Los Blancos hi an inkhelh chhung zawnga a bet zawkah an tang a. An goalkeeper Thibaut Courtois chuan save tha vawi engemaw zat a siam a, Lewandowski goal khung tur a dan bakah Ousmane Dembele ball pet kawh tak mai a dang tha hle bawk.
Kheltha tak Gavi-a’n Spanish Super Cup record siamin goal khung thei naupang ber a ni a, tuna a manager Xavi record siam chu a khum.
Barca legend Xavi chuan, “Kan inkhelah ka lungawi a, hnehna chan hian min tat hriam zual a, inrintawkna min siam thin. Vawiinah ball hloh kan nei tlem a, kan midfielder ten an hna an chiang. Kha aia tha a khelh kha chu kan nei thin, mahse player te ka lawmpui a, tunhnaiah an phu loh selna an tawng nasa.” tiin a sawi a.
“Madrid lakah hetiang hi kan ti thei a nih chuan tupawh kan hmaah ding se kan hneh thei a ni.” tiin a sawi bawk.