Congress hruaitu, Rahul Gandhi chuan Inrinnia Jammu-a bomb pahnih a puah tuk lawkah Jammu & Kashmir-ah Bharat Jodo Yatra a kalpui mek chhunzawmin Pathianni khan kawng a zawh leh.
Gandhi-a hian Hiranagar Morh, Kathua district-ah zing dar 8:00 vel atangin kawng a zawh tan a. A hma ni chiaha thil thleng avangin venhimna khauh taka kalpui a ni.
Congress MP hi J&K Congress President Vikar Rasool Wani bakah president hlui, Ghulam Ahmed Mir, party thupuangtu Ravinder Sharma leh hruaitu dang eng emaw zatin an tawiawm.
Ke kawng zawhin km 22 vel a kal a, Duggar Haveli, Samba district a thleng a. Hetah hian AICC incharge, J&K affairs leh an party MP Rajni Patil leh Wani te nen thuthar lakhawmtute an kawm zui.
A hma ni chiaha bomb puak vang hian venhim hna thawktute an fimkhurin Gandhi-a hi an hual titih a ni.
Inrinnia Jammu khawpuia bomb pahnih puak hi Narwal-a thleng niin mi pakuain hliam an tuar a, pakhat chu a na hle nghe nghe.
Gandhi-a hi Pathianni zan khan Nanak Chak, Samba-ah riakin Thawhtanni tukah Vijaypur atangin Satwari Chowk, Jammu thleng kawng zawh leh tura ruahman a ni a, chawhnu dar 1:00-ah vantlang inkhawmah thu a sawi zui ang a. Thawhlehniah thuthar lakhawmtute a kawm ang.
Yatra hi January 30 hian Congress headquarters, Srinagar-ah Hnam puanzar pawt parhin a khar ang.