Congress atanga a chhuah hnu lawkah, Manipur unit Congress chief thin, Govindas Konthoujam chuan Pathianni khan New Delhi-ah BJP a zawm.
Konthoujam hi BJP hmunpuiah an Chief Minister N Biren Singh-a chuan an party hruaitu, Sambit Patra awm laiin a lawm lut.
Kum 2017-a assembly inthlan a nih khan Congress hi party mala MLA ngah ber an ni a; mahse, BJP chuan party dang thawhpuiin sorkarna an siam a. Inthlan lo awm leh turah pawh a theih theih pawh khawma chak ngei tumin hma an la mek.
Inthlan lo awm leh tura Congress-in chief minister atana an vawrh chhuah ngei tura rin, Konthoujam-a hi an state president atan December, 2020 mai khan dah thar a ni a. Chhuaka BJP a zawm leh ta mai si hi Sonia Gandhi-i kaihhruai party tan chuan thil pawi tak ni tura ngaih a ni.
Pathiannia amah lawmluhnaah hian Chief Minister Singh chuan, “Prime Minister Narendra Modi hian hmarchhak hi a ngai pawimawh a, tun hnaiah pawh helai bial atanga MP panga chu union cabinet-ah a seng lut a. Manipur pawh hian Modi-a hruai sorkar hi chak zawka siam a tum a ni,” a ti.
Konthoujam-a hi Bishnupur bialtu, Congress MLA niin July 28 khan a bâng a. A banna hi assembly secretary hnenah a thehlut.
Bishnupur bial atang hian a zawnin vawi ruk ngawt thlan tlin tawh niin Congress Legislature Party-ah chief whip a ni mek.
July 21-a an party atanga a chhuah hlim khan Manipur Congress chuan Gandhi-i hnenah an state-a thil thleng chu ngaihven tur leh Congress in-charge for Manipur chu zintira an hruaitute kawm turin an lo ti tawh.