K-pop supergroup BTS member Jimin chu S Korea solo artist zinga US Billboard Charts-a ‘ber’ nihna hauh thei hmasa ber a ni ta.
A hla hit, ‘Like Crazy’ hmangin Billboard Hot 100 list-ah a chungnung ber ta a, sales, streaming leh radio airplay atanga chhut a nih vangin Jimin huhang natzia leh a hla slow jam ni bawk siin ngaithlatute rilru a chiah natzia a lang chiang.
Kum 27 mi hian Instagram-ah a hlawhtlinna chan ropui tak hi tarlangin, follower maktaduai 49 chaung hmaah a lawmna hun a hmang.
Kum 2020 khan BTS hi Billboard charts-a South Korean artist/group-in top nihna an chan hmasak ber theih nan an lo dingchhuak tawh.
Nikum khan boyband lar tak ni bawk hian solo project te buaipui tumin band anga kalho a remchan tawh hrih loh thu leh an chawlh lailawk tur thu an lo puang tawh a, member thenkhat sipaia tan ngei ngei ngai bawk nen, zai ho tham tham a remchang lo.
Jimin hlawhtlinna, ‘Like Crazy’ hian band anga zai ho dial dial a awm tawh lo chung pawha BTS larzia, rimawi khawvel an al hnehzia chiang takin a pholang niin, music industry-a mithiamte chuan ngaihdan an sawihlawm.
BTS hi US-a K-pop music thlipui a tleh huk huk theihna tura kawng sialtu leh K-pop music puluttute an ni a, ‘Dynamite’ leh ‘Butter’ tiamin number one ni thei hla paruk ngawt an nei thei.
Member duhawm tak tak- Jimin, RM, Jungkook, Jin, Suga, J-Hope leh V te hi nikum khan khawvela best-selling artist pahnihn niin, Taylor Swift chiah an pha lo.