Congress party hruaitu, Rahul Gandhi chu kum 2019-a a thu sawinaah mi a tihmingchhia tia puhna avanga kum hnih lung in tang tura hremna a appeal-ah Thawhtanni khan a thu thehluh ngaihtuah a nih hma, April 13 thleng bail-a chhuah rih a ni.
Gujarat court-a appeal a thehluhnaah hian Gandhi-a hi a farnu, Priyanka Gandhi Vadra leh Congress hruaitu lawk tak tak, chief minister pawh pathum laiin an tawiawm a. Surat-a sessions court-ah a thehlut a ni.
Congress president hlui thubuai hi April 13-a ngaihtuah leh tura tih niin hemi hma zawng hi chu zalenin a awm thei dawn a, ngaihtuah leh hunah pawh hian amah a inlan kher pawh a tul tawh dawn lo.
Court-in a thu thehluh chungchanga thutlukna a siam hnuah Gandhi chuan ‘Mitrakal’ tia a sawi, BJP sorkarin a hnuaia agency-te hmanga Congress a beih chu a bei let zel dawn tih Twitter-ah a tar lang.
“Hei hi mipui rorelna chhan nana ‘Mitrakal’ beihna a ni a. He hun harsaah hian thu dik chu ka ralthuam a ni a, thu dik chu min tantu a ni,” tiin Hindi-in a tar lang a ni.
Gandhi-a hremna hi hlih a nih loh chuan MP a nihna paih chu kaltlangpui a ni dawn a, kum riat zet inthlan a chuh thei dawn lo bawk a. Tunah hian sorkar bangla a luah mek chhuahsan tumin a intel fel tawh bawk.
Surat-a court-a thu thehlut tur hian Congress chief minister pathum – Ashok Gehlot, Bhupesh Baghel leh Sukhvinder Singh Sukhu ten an tawiawm.
Pathianni khan a nu, Sonia Gandhi chu a hmu bawk.