Bangladesh khawpuia thawmhnaw zawrhna hmun hriat hlawh tak, dawr pawh 3,000 zet awmnaah kangmei nasa tak a chhuak a, kang thelhtu leh sipaiten thelh tumin an bei mek.
Dhaka khawpuia Bangabazar Market-ah hian an ram huna Thawhlehni zing dar 6:10 (India-a zing dar 6:40) khan kangmei hi a chhuak tan a mihring thi leh hliam erawh an awm hriat a nih rih loh thu tual chhung fire services thuneitu, Rafi Al Faruk chuan The Associated Press news agency hnenah telephone-in a hrilh.
Kang thelh pawl unite 47 zetin thelh mih tuma an beih thu a sawi a, an khawpuia veng hlun ber chu meikhu dum takin a tuam vek niin a sawi bawk.
“Tunah rih chuan thi an awm kan la hre lo,” a ti bawk.
Dawr neitute leh fire department thuneitu dangte chuan Bangabazar Market leh a bul hnai sumdawnna hmun pathuma dawr zawng zawng chu a kang chhe vek niin an sawi.
Fire service thuneitu sang dang, Anwarul Islam chuan engtin nge kangmei hi a chhuah tan theih tih ngaihdan an la neih theih loh thu a sawi.
“Kang thelhtu 600 velin thunun tumin an la bei mek a ni,” tiin fire department thupuangtu, Rakibul Islam chuan AFP news agency a hrilh.
Sipai thupuangtu pawhin air force helicopter hmangin a thelh hna hi an thawh ve thu a sawi bawk.
Chopper atanga thla an lak darhah chuan mi thahnem takin a bul hnaia lei dawh atangin kang leh a thelh hna thawh mek hi an thlir hlawm.
Bazar kang ta hi khawthlang rama fashion brand lar tak tak, Tommy Hilfiger te pawh tiamin, man tlawm tak taka zawrhna hmun a ni a, he khawpuia thawmhnaw an siam chhuahna, garment factory atanga an lak a ni a; mahse, fashion brand-ten an hralh chhuah ang tak tak (export standard) erawh a pha lo hret thung.
Bangabazar Shop Owners Association-a an hruaitu, D M Habib chuan dawr 3,000 awmte hi a tam ber chu rangva leh thinga sak a ni a, a kang chhe vek niin a sawi.
Bangabazar hi Dhaka South City Corporation-in an enkawl niin tun hma lam pawhin kangmei a lo chhuak zauh zauh tawh a. Sorkarin a chhinchhiah dan chuan kum 10 liam ta chhungin a tenau leh liantham deuhvin vawi ruk vel a kang tawh.
“Tun tuma kang erawh a nasa em em a ni,” tiin Habib chuan a sawi a. “Kum 1995-a nasa taka kang, bazara dawr zawng zawng a kan chhiat vek kha min hriat chhuahtir a ni,” a ti.
Bangladesh-ah hian sumdawnna hmunah hian inenkawlna leh kangmei laka himna tura thil duan a awm mumal loh avangin kangmei nasa tak tak a lo chhuak tawh thin.
Hetih rual hian an rama thawmhnaw lam siam chhuahna industry lian tak hian tun hnaia kangmei avanga chhiatna a tawh fo avangin tun hnaiah chuan hemi lamah hian dinhmun him leh tha zawk a nei ve nasa tawh hle thung.