China chuan tun hnaiah South Tibet tia a sawi, Arunachal Pradesh ram chhunga hmun 11 hming a thlak a, New Delhi leh Beijing inkar a khik lai taka hetianga ti hi a ni.
Hming a thlak zingah hian tlang sang te, lui leh mihring chenna hmun te pawh a tel.
Tun hi China-in Arunachal Pradesh-a hmun hming a thlak vawi thumna ni tawhin April, 2017 leh December, 2021 pawh khan a lo thlak tawh.
He thilah hian Indian thuneitute atanga sawi engmah a la awm lo va. Hemi lam hre deuhte chuan India lam hian thil thlengte hi an ngaihven reng a, tun hnaia China nena inkar khi chu a zau zel niin an sawi.
A hma lama hming thlak tawhte kha India chuan a hnawl a, New Delhi chuan hmarchhak state hi a ram chhung leh India atanga ‘lak hran theih loh’ a nih thu a sawi.
“State Council (China-a an cabinet)-in ram leh hmun hming a thlirhnaa rawt angin kan ministry chuan a kaihhnawih department-te nen Tibet chhim lama hmun hmingte a thlak,” tiin China-a civil affairs ministry chuan Pathiannia thuchhuah tawi tê a siamah a tar lang.
“Pathiannia ministry-in hmun hming a thlakte chu ram hmun hnih, chenna hmun hnih, tlang sang panga leh lui pahnih a ni,” tiin China sorkar chanchinbu, Global Times chuan Thawhtanni khan a chhuah.
China-in hmun hming a thlakte hian Arunachal Pradesh hrim hrimah chuan nghawng a nei lem lo va, a mi chengte pawhin an sawi dan pangngai vek thovin an sawi thin a; mahse, India-in a ram chin tia a hauh hmuna a ep tak ramin thu a nei hi innghirnghona tizualtu a ni thei.
India leh China hi Ladakh sector-ah kum thum vel chhung zet chu an lo inep tawh a. May, 2020-a an sipaite an inphek sual hnuah phei chuan an boruak a tha lo lehzual a, sipai pawh an chhawp teuh ve ve.