Aizawl East II bialtu MLA, Minister of State ni bawk, Robert Romawia Royte-in a bial, Dawrpui Veng tlawhin, Dawrpui West Welfare Committee hruaitute nen Aizawl Civil Hospital thliin a bulhnaia cheng harsatna a siam thin tihreh dan tur an enho.
Robert Romawia Royte chuan a tlak lam kawngpuia Aizawl Civil Hospital thli luang thla thin chu veng mipui leh helai paltlang thinte ngaimawh leh hriselna atan pawha pawi thei a ni tih a hriatpui thu sawiin, a tihreh dan tur ngaihtuah a tul thu a sawi a. Health department nen tanghova SASCI project atanga hmalak a tum thu Dawrpui West Welfare Committee chu a hrilh a ni.
Aizawl East II biala awm tho, Tuithiang Veng mawng lam atanga motor kawng sial mek pawh bialtu MLA chuan tlawhin, hnathawh dan leh hmabak la awmte chu PWD engineer leh Tuithiang Veng khawtlang hruaitute nen an enho a. Tuithiang Veng Biak In kawt thlenga motor kawng sial luh tum a nih thu sawiin, Tuithiang Veng thlanmual, World Bank road bula YMA Futsal Ground siamna tur pawh a ngaihtuahsak tur thu a sawi bawk.