AZL: Serchhip bial bye-election lo awm tura MNF candidate Vanlalzawma’n Thenzawla puantaha eizawngte chawikang tura sorkarin hmalak a tum thu a sawi a. Industry minister leh chief minister pawh hemi chungchang hi a sawipui tawh thu a sawi.
MNF thalaiin Serchhip bial bye-election lo awm tur atana street campaign ‘Nipui Fehchhuah’ Inrinni kal taa Thenzawla an buatsaihah he thu hi Vanlalzawma chuan a sawi a. “Candidate dangte mi tha tak tak vek ni mah se, Serchhip bial enkawl turin ka remchang ber a, tun term-ah kum thum lai a la awm a, chumi chhunga ruling MLA neih chu a fuh berin a rinawm,” a ti.
Vanlalzawma chuan Thenzawl khua chu Mizorama field nei tha bera hriat thin ni mah se, tunah chuan Thenzawl aia field nei tha an tam tawh tih sawiin, field nei tha ber an nih leh theihna turin ruling party candidate thlan tlin a pawimawh thu a sawi a. Sorkar lai thlawp zawnga vote an thlak chuan hmasawnna tam tak Thenzawl-ah a lut dawn tih a chiang niin a sawi bawk.
MNF thalai president Er. Lalrinawma pawhin MNF-in ram tan zalenna a lo sual tawh thu sawiin, hnam pasalthate hnung zuia ram siam that tuma MNF sorkarin theihtawpa ke a pen mek thu a sawi a. Ram kaihruai mektu, MNF chu thawhhopui tlak a nih thu sawiin, MNF candidate Vanlalzawma vote theuh turin mipuite a sawm.
AMC councillor David Zohmangaiha pawhin, MNF candidate Vanlalzawma chu Thenzawl khawtlang leh ram tana tha tur a ni tih sawiin, lo vote theuh turin mipuite a sawm bawk.