Myanmar ram buaina tlansana Mizorama rawn tlan lut an pung zel a, raltlan lo mikhualtute zingah ei leh bara talbuai an awm chho tan.
Raltlante hi Champhaiah an lut tam ber a, East Tuipui bial chhung khaw hrang hrangah an tlan lut a; Thekte leh Farkawn khuain mikhual an ngah zual a. Heng khuaa raltlan lo mikhualtute hi buhfaiah tanpui an ngai tan tawh a ni.
Tuipuiral Group YMA hruaituten The Zozam Times an hrilh danin, raltlante hi an tlan luhna khuaten khualpang thlenin an lo thleng thin a. Mikhual an tam chhoh zel avangin mikhual nei lo chhungkua an awm mang tawh lo a, chhungkaw thenkhat chu buhfai pek ngai hial an awm tawh.
“Tuipuiral Group YMA chhungah Farkawn leh Thekte hian mikhual an ngah zual a, an talbuai deuh hlek tawh a. Supply department-ah te buhfai kan dil a, heng khaw hnihah hian a theih ang angin buhfai kan sem tawh,” tiin Tuipuiral Group YMA hruaitute zinga mi chuan The Zozam Times a hrilh.
February 19, 2021-a Tuipuiral Group YMA Conference-in resolution siamin Tuipuiral Group YMA huam chhunga YMA Branch hrang hrangten Zohnahthlakte lo tuamhlawm turin an inpeih reng tih an lo sawi tawh a. Group YMA Conference thurel ang hian he group YMA huam chhunga branch hrang hrangte chu mikhual thleng turin an inpeih a, branch thenkhat chuan mikhual eng emaw zat an nei tawh a ni.
Aizawl chhungah pawh Myanmar atanga tlan lut an pung zel a, mi 500 an chuang tawh nia thudawn a ni. Aizawla rawn tlan lutte hi veng hrang hrangah an thlen darh bakah hmun khata dahkhawmte pawh an awm.
Thudawn danin, Aizawl chhunga tlan lut zingah thlenna baihvai thahnem tak an awm avangin chung mite dahkhawmna hmun chu buatsaih a ni a, helai hmunah hian mi 100 dawn an awm nia thudawn niin, mipui thil pek khawm hmangin an ei leh in ngaihtuahsak an ni.