Spanish club hlun Valencia in La Liga atanga tlak loh tuma an beihna chhunzawmin point pawimawh an hmu a, Rayo Vallecano nen 1-1 in an inhnehtawk.
Thawhtanni zana Estadio Mestalla a inkhelah Los Che hian a hniam pathumte chunga awm turin point pawimawh an hmu a, an dinhmun erawh a la him lo hle.
Mikhual team Rayo in inkhel tan hnu lawkah goal an khung a, Santi Comesana chuan penalty area chhungah zam hauh lovin goal hmahruai a khung.
Rayo an kheltha a, Valencia in second half-ah insiamtha in hlauhawm zawkin football an khel ve bawk.
Dutch forward Justin Kluivert goal khung tur chu Stole Dimitrievski chuan a dansak a ngai a. Mahse inkhel tawp hma in Kluivert hian goal khung ta thovin sawihlawh angreng takin penalty an hmu a, goal-ah a khung.
Valencia hi mahni mualah a zawna vawi thum an tlawm lohna a ni a. Rayo hi season bul tan tha nimahsela a zawnin vawi sarih chak hmel an hmu lo tawh.
Valencia coach Ruben Baraja chuan, “Draw hi kan tana a thatna pawh a awm. Point thum hmuh duh mah ila point khat hi a chhe lova, kawng dik kan zawhna a la ni zel thei.” tiin a sawi.