Manchester United defender Luke Shaw chuan kum li contract thar a ziak a, kum 2027 June thleng Old Trafford-ah a cham dawn.
Kum 27 mi Shaw hian kum 2014 khan Southampton atangin Manchester a pan a, a contract thar ziah avang hian United-ah hian kum 10 chuang a khel dawn tihna a ni.
Tun season-ah manager Erik ten Hag hnuaiah Shaw hian season tha a hmang mek a, inelna hrang hrangah match 36 khelin goal khat a khung bakah assist vawi 6 a nei.
Tlarhnungah player pawimawh zingah telin veilam sirah leh a laiah a tul dan anga khelh tir a ni thin a. Hei chauh hi ni lovin squad-ah pawh hmahruaitu zingah telin dressing room a mi pawimawh zing ami a ni tawh.
“Kum 9 kalta khan he club ropui tak hi ka lawm a, ka cham zui zel thei tur hi ka phur tak zet.” Shaw chuan a ti a.
“Manchester-ah kum tam tak ka hman chhungin nasa takin ka inzir a, puitlin lam ka pan. Player leh mihring mihrinna kawngah pawh hma ka sawn hle a, he club a hlawhtling tura kan mawhphurhna hi ka hrechiang telh telh.” tiin a sawi bawk.
Shaw hian United -ah hian game 249 a khel tawh a. A coach hlui Jose Mourinho chuan a puitlin hle a ngai tia a lo sawisel tawh thin hnuah Ole Gunnar Solskjaer leh Ten Hag te hnuaiah rin a hlawh hle.
United football director John Murtough chuan, “Luke hi squad a player pawimawh tak zing ami a ni a, khawvela defender tha ber zinga tel thei turin hma a sawn.”
“A theihna sang tak bakah hian hmahruaitu nihna leh entawntlak taka hun hmang thin a nihna te a telh thar a, United kawr hi kum tam tak a hak zel kan beisei a ni.” tiin a sawi.