French Open champion lai Rafael Nadal chuan kuminah Roland Garros-ah a lallukhum humhim turin a inlan thei dawn em tih a chiang lova. Karleh a khelh tur Monte Carlo Masters atangin a inhnukdawk.
Spanish world number 14 ni lai hi Monaco a clay court tournament-ah hian vawi 11 a champion tawh a. Tunah hian a kawng hliam a la dam chian theih loh avangin a tel thei dawn lo.
Kum 36 ni tawh Nadal hian January thla a Australian Open a Mackenzie McDonald straight set a a hneh loh hnuah inkhel a la hmachhawn leh lo.
Nadal hi Australian Open zawhah a hliam hi endik niin thla hnih vel chawl tura ngaih a ni a. Nimahsela a la dam chian theih loh avangin May 28 a khelh tur French Open inbuatsaihna atana tam takin an hman thin tournament hi a khel thei dawn lo.
Social media lamah Nadal chuan, “Inelna hmachhawn a, tennis player tha berte nena inel turin ka la inpeih lo. Ka tana tournament pawimawh zing ami Monte Carlo-ah ka khel thei dawn lo.” tiin a sawi a. French Open khelh erawh a la inbeisei a, mahse engmah a la chiang lo niin a sawi.
Ani bakah hian world number two Carlos Alcaraz pawh Monte Carlo-ah hian a tel dawn lo.