Aizawl : ZPM Leader Lalduhoma chuan nawmsak hmasak a, reilote chhunga hausak thur thur tuma politics an khelh chhung chuan ram hi a chhe zel dawn niin a sawi.
Thawhlehnia Sakawrdai Community Hall-a Tuivawl Block Conference-ah thu sawiin Lalduhoma hian, ZPM-in Pathian len lohna economy an tuipui loh thu a sawi a. “Hmasawnna kan neih hi Pathian pawmpui hmasawnna ni turin kan buatsaih dawn a ni. Pathian tel lo hmasawnna chuan nuamtawlna leh Pathian mamawh lo nia inhriatna a thlen a, a tawpah chhiatna leh mualphona a thlan leh thin,” tih sawiin, a ram leh a felna zawng hmasa phawt zela ke pen a nih chuan Pathian malsawmna an dawng ngei dawn niin a sawi.
Lalduhoma hian nawmsak hmasak a, reolite chhunga hausak thur thur tuma politics an khelh chhung chuan ram hi a chhe zel dawn nia sawiin, “Sorkar official leh mipui mimir pawh rinawm hlei thei lovin min siam ta mek a ni. Thlarau thianghlim tel ve theih lohnain chhungkaw tam takin ei kan zawng mek a, Pathian malsawmna kan dawng thei lo a ni,” a ti.
Dik lohna hi ngaiah kan nei ta mek nia sawiin, “Dik lo zawk awtin leh itin kan nun kan hmang mek a ni. A langin sum leh pai hmangin vote kan zawng a, chuti chung chuan neih engmah nei lo ZPM candidate te Serchhip leh Lungleia LMC thlanna neihah thlan tlin kan ni,” tia sawiin, hei hian pawisa hmanga inleitlin ngawt a theih tawh loh a ni tih chiang taka a tihlan thu ZPM leader hian a sawi.
Sinlung Hills Development Council in dan mumal tak a neih theihna turin hun rei tak atang tawh khan Assembly House-ah a lo au pui tawh tih sawiin Lalduhoma hian, “Vawiinah dan mumal tak kan nei ta hi a lawmawm hle a, kan dan neih erawh a nihna tur anga hman a la ni lo erawh a pawi hle a ni,” a ti a. ZPM a sorkar hunah chuan sorkarna chelhtu leh Hmar mipuite hi pumkhatin an awm ang a, pawl pawl awma kal reng hi tihtawp a nih tur thu leh Aizawla Council Office awm pawh Sakawrdai lamah sawn a nih tur thu a sawi bawk.