Public Works Department (PWD) hotuten Mizoramah National Highway leh a kaihhnawih hna panga, Rs. vaibelchhe 2,554.98 hu an thawk mek tih Larsap Haribabu Kambhampati an hrilh.
PWD hotute chuan nimin khan Raj Bhawan-ah Larsap Kambhampati hmuin PWD hnathawh leh hmalaknate an hrilhfiah a, National Highway 108 chhunga Sairang leh New Eden, Tripura inkar kawngpui sial hna thawh mek a nih thu leh hna zaa 94 thawh zawh a nih tawh thu te, Lawngtlai – Zochachhuah, KMTTP kawng sial hnathawh mek pawh zaa 98.01 zawh a nih tawh thu te an hrilh.
Hna dang pahnih thawh mek an neih bakah km 17.5-a thui, Seiling – Tuivai kawng sial hna an thawh pawh tun hnaia an zawh fel thu te PWD hotute chuan larsap chu an hrilh a. National Highway hna thar pathum tan tur an neih thu leh hna dang paruk pawh Ministry of Road Transport & Highways (MORTH) ah proposal thehlut mek a nih thu larsap chu an hrilh.
PWD hotute chuan Pradhan Mantri Gram Sadak Yojana (PMGSY) hnuaia hmalaknate pawh larsap chu hrilhin, PMGSY hnuaiah Mizoram pumah project 351, kawng kilometre 4,482.732-a thui, Rs vaibelchhe 2840.08 man sanction a nih thu te, chung zinga project 300 chu thawh zawh tawh a nih thu leh hnathawh mek project 51 chu kilometre 277.735-a thui a nih thu te an hrilh bawk.
Larsap chuan a koh chhan chu hna an kalpui mek dinhmun te, hna a hun taka zawh loh a nih chhan te leh hemi kawnga harsatna an neih te hriat duh a neih vang a nih thu a sawi a. Bairabi leh Sairang rel kawng inkara railway station pali awmte chu a bulhnaia khaw awmte nen inkawlpawhna sial a pawimawh thu sawiin hemi chungchanga hmalak pawimawh a tih thu a sawi bawk a ni.