AZL: Aizawl Municipal Corporation huam chhunga Durtlang Leitan leh ITI Veng Local Council member pakhat ve ve-te hmun a ruak avang leh Zemabawk Local Council thiah a nih tak avangin hmun ruak hnawh khat turin State Election Commission, Mizoram chuan ni April 19, 2023 hian inthlan a buatsaih dawn.
Local council pathum bye-election neih tur chungchangah Aizawl DC Dr. Lalhriatzuali Ralte, District Municipal Election Officer (DMEO), Aizawl District ni bawk chuan inthlan kaihhnawih tur sorkar official bakah political party leh NGO hrang hrang aiawhte kohkhawmin nimin khan Aizawl SP’s Conference Hall-ah meeting a neihpui.
Dr. Lalhriatzuali Ralte chuan inthlan felfai leh dik tak neih theih turin election official bakah political party, NGO, MPF leh mipuite tanrual a ngai hle tih a sawi a. Model Code of Conduct puan a nih hnuah phei chuan fimkhur lehzual tura chahin Aizawl DMEO chuan Election Commission-in a ngaih pawimawh em em, rualbanlote pawhin vote an thlak theih turin theihtawp chhuah a ni dawn tih a sawi bawk.