Aizawl: Agriculture department-in West Serzawl-a Oil Palm Seed Garden a buatsaihah kum 2025-26 atangin a chi tha siam chhuak hman tura hmalak mek niin, a hlawhtlin hunah a hralhna manah kum khatah Rs nuai 150 chuang lak luh theih beisei a ni.
Nilaini khan State Planning Board Vice Chairman H Rammawi leh chanchinbumi thenkhatin Oil Palm Seed Garden tlawhin hmalak mek dan an en a, hmalakna tura hmachhawpte agriculture director leh a enkawltu officer-te an sawi fiah.
Agriculture department hotute sawi danin, West Serzawl-a Oil Palm Garden hi kum 2014 atanga buatsaih tan a ni a, Indian Council of Agriculture Research hnuaia Indian Institute of Oil Palm Research-in sum leh an thiamna hmanga an dinpui a ni a. Ram hectare 15 zetah oil palm chi tha bik, a chi thlah tur a nu kung leh a pa kung 2,000 phun a ni a. Hemi atang hian a chi thlah tur bik, a nu leh a pa kung thlan a ni ang a. Chungte chu inthlah pawlhtirin oil palm chi tha siam chhuah tum a ni.
Kum 2025-26 atangin oil palm chi tha hi siam chhuah hman ngei tuma hmalak mek a ni a, siam chhuah a nih hunah India ram state dangin helai atang hian oil palm chi an lei thin ang a, a hlawkna chu Mizoram sorkarin a tel dawn a. Oil palm scientist-te chhut danin a chi hralhna manah hian kum khatah Rs nuai 150 chuang Mizoramin a hmu thei dawn a ni.
Agriculture department hotute chuan tun dinhmunah kawlphetha chawk luh a la nih loh avangin laboratory bun a la ni lo chu an harsatna tawh lian ber a nih thu an sawi.
State Planning Board Vice Chairman H Rammawi chuan Indonesia leh Malaysia ramin oil palm a hlawhtlinpui dan hi zirchian a nih hnuah sorkarin Oil Palm Act a duang a, chumi hnuah chin tan a ni a. Mahse, hun hmasa lamah mi mal farm-ah ching tura an pek chhuah chu an tihfuh loh lian ber a nih thu a sawi.
H Rammawi chuan agriculture department-in oil palm chi hralh thei tura hma an lak mekna chu a rin phak bakin hma an la thui tawh tih sawiin, “A chi tha siam lam kan kalpui tawh a, ke kan pen thui tawh hle. He hmalaknaah hlawhtling a nih chuan Aizawl atangin ram pawnah kan hralh chhuak thei tawh a. A hralh chhuahna atangin Mizoram sorkarin sum tam tak a lak luh theih dawn bakah, kut hnathawktute pawhin a hlawkna an tel nasa hle dawn a ni,” a ti.
H Rammawi hian Oil Palm Seed Garden-in harsatna an tawk mek leh an mamawhte ngaihtuahsak a tum thu a sawi a. A tul angin ICAR atangin la rel ho turah a ngaih thu leh theihtawpin hma lak sak an tum thu a sawi bawk.
West Serzawl-a Agriculture Department-in Oil Palm Seed Garden a buatsaih mek hi India Hmarchhakah a awm chhun a ni.