Siaha District Election officer (DEO), Siaha Bawrhsap Lalhmunsanga Hnamte-in tun thla ni 18-a Mara autonomous district council huamchhunga village council inthlan lo awm tur chungchangah thuthar thehdarhtute a kawm a. MADC huam chhunga VC 99-ah inthlan buatsaih a nih tur thu a sawi.
Seat awm zawng zawng seat 591 (general 393, reserved 99 leh nominated seat 99) a nih thu Siaha District Election officer chuan a sawi a. Tuntum inthlan lo awm turah hian candidate 1250 (general 1011, reserved 239) an awm tur thu sawiin, BJP-in candidate 454; INC-in 261; MNF-in 402; ZPM-in 84 leh Independent candidate 49 an awm thu a sawi.
MADC huam chhunga VC inthlan lo awm turah hian voter 43120 (mipa 20794, hmeichhia 22326) an awm thu DEO chuan a sawi a. Voter tamna ber New Siaha West-I VC-ah voter 1184 an awm thu sawiin, voter tlemna ber Supha VC-ah voter 68 an awm thu a sawi.
Voter 1000 aia tam an awmna VC pahnih – New Siaha West -I VC leh College Vaih-I VC an awm thu sawiin, voter 100 aia tlem an awmna VC pathum – Supha VC, Riasika VC leh Miepu VC te an awm thu DEO chuan a sawi bawk.
Polling official ten tun thla ni 16 leh 17-ah an duty na hmun an pan tur thu DEO chuan sawiin, Siaha atanga khaw hla zual 22-a duty tur te tun thla ni 16-ah an chhuak ang a, a dang zawnga duty tur te chuan inthlan hma ni, tun thla ni 17-ah an duty na tur hmun an pan dawn niin a sawi.
He inthlan chuh tuma hming pe, inhnukdawl leh 8 an awm thu DEO chuan sawiin, inthlan chuh tuma hming pe zingah pakhat hnawl a nih thu a sawi a. Candidate tamna ber Meisatla-I VC-ah candidate 25 an awm thu leh candidate tlemna ber Riasika VC leh Ahmypi VC-ah te candidate 5 ve ve an awm thu a sawi bawk.
Siaha DEO hi Siaha SP VL Lura Hauzel, Addl. DC Lalnunmawii leh DIPRO N. Vabeiratlua ten an tawiawm a ni.