School Education department leh Rotary India literacy mission (RILM)-in thawhdunna tur thluthlung an ziak a. He thawhdunna tur thuthlung hi naupangte zirtirna TV programme-a pekchhuah kawnga thawhdunna tur a ni ang.
Sorkar thuchhuahin a tarlan danin sorkar laipuia Ministry of Education chu state tin ten zirna (education) atan bik, a thlawna hman tur TV channel pe turin a inruahman mek a, hei hi zirlai tin te, hmun kilkhawr bera awm te, zirtirtu awm mumallohna hmuna zirlai awm te pawhin zirna tha an dawn theihna atana ruahman a ni.
He ruahmanna hi PM eVIDYA DTH TV channel tih niin, School Education department pawh he TV channel hi enkawl tura tih a ni a. TV programme chu state tinin buatsaihin, BISAG, Gujarat atangin tihchhuah thin a ni dawn a. PM eVIDYA programme atan hian SCERT, Mizoram chu State Coordinating Agency atan ruat a ni bawk.
He programme tihlawhtling tur hian RILM chuan NCERT syllabus mila learning content an siam sa te a thlawna hman theih turin Mizoram chu thawhpuiah an rawn sawm a, hun engemawchen an inbiak hnuah April 11, 2023 khan Secretary, School Education department office-ah thawhhona thuthlung an ziak ta niin sorkar thuchhuah chuan a tarlang a ni.