MNF party-in ZMC-a MBBS zirlai hmasaber (2018 batch) te result chhuaka zirlai 95 zinga hlawhtlinna chang mi 68 te an lawmpui thu an sawi a. Eptu party thenkhatin, ZMC chu sorkarin ngaihthah leh enkawl tha lova an puh thin laia ZMC atanga MBBS pass chhuak an awm ta chuan ZMC chu sorkarin a ngaihthah loh zia a tilang niin an sawi.
ZMC tihchangtlun zel a nih avanga lawmawm an tih thu MNF party chuan sawiin, “Hun rei tak hripuiin min tibuai chung pawha theihtawp chhuaha medical college tihpuitlinna tura hmalatu Chief Minister Pu Zoramthanga kaihhruai sorkar leh Health Minister Dr. R. Lalthangliana te thawhrimna chhuanawm kan ti hle a ni” an ti.
MNF party chuan Covid-19 kai damlote enkawlna atana ZMC chu engemawchen hman a nih avangin MBBS zirlaite pawhin harsatna tam tak an tawk tih sawiin, “harsatna tam tak kara zirlai hlawhtling te kal zelna turah duhsakna kan hlan” an ti a. Hlawhtling ve ta rih lo te pawh a leh pekah hlawhtlinna chang ngei turin duhsakna an hlan.
MBBS zirchhuak thar ten internship an tan thuai theihna turin Health Minister Dr. R. Lalthangliana’n chak takin hma a la mek niin MNF party chuan an sawi a. National Medical Council nen indawrna a kal mek thu leh hei hian kum tharah chuan Mizorama doctor indaihlohna pawh engemawchen a phuhruk tur thu an sawi bawk.