MNF Sr. Vice President, Dy. Chief Minister, UD&PA changtu ni bawk Tawnluia’n Lunglei Municipal Council-ah Chairman, Vice Chairman leh Executive Councillor pahnih an awm dawn tih sawiin, danin a phal chinah chuan chak taka theihtawp a chhuahpui tur thu leh chumi tur chuan Councillor thlan thar te pawh lo inkau deuh se a duh thu a sawi.
Nimina MNF party chhung inkhawmah he thu hi Tawnluia chuan a sawi a. LMC a thlantlin te chu thawhpuiah sawmin, “Lunglei khawpui enkawl kawngah tih tur a awm chuan sorkar angin kan tlanchhe dawn lo” a ti.
Lunglei khawpui chu MNF sorkarin a ngaihthah hran lo nia sawiin Tawnluia chuan “LMC a kan tlin loh avangin kan ngaihthah dawn lova, a hma aia nasa in kan ngaihsak dawn” a ti a. LMC-a an nil chu MNF demna tur leh chauh phah na tur a ni lo nia sawiin, “Politics -ah chuan san chang leh hniam chang a awm. Chung lamin kan harhna tur, kan hriat tur min hrilh tawh, kan thawk zel anga kum tawp inthlanah chakna kan chang leh ang’ a ti.
MNF Sr. Vice President chuan mipui hnena thuneihna tam zawk pek chu kum 2018 inthlan dawna MNF auhla a nih thu sawiin, LMC din chu MNF manifesto tihhlawhtlinna a nih thu a sawi a. ‘Khawpuiah Municipal Council pek a ni ang’ tiin kan tiam a, Lunglei, Champhai leh Kolasib pawhin municipality hi an dil a. MNF sorkar hnuah cabinet meeting-in a pawm a, Lunglei Municipal Council din a ni” a ti bawk.