ZPM party-in nimin khan Vanapa hall kawtah ‘Dikna duh Punkhawm’ an huaihawt a, Robert Romawia Royte Minister of State a nihna atanga ban ngei an phut.
He punkhawm hi ZPM Action Committee Member Dr. C Lalrammawia’n a kaihruai a, ZPM party hruaitu ten Aizawl East-II bialtu MLA Robert Romawia Royte, Minister of State-in dan a bawhchhiat hrang hrang nia an ngaih te an sawi.
Larsap hnena Robert Romawia ban tura ZPM aiawha Larsap hnena lehkha thehluttu ZPM General Secretary SL Ngursailova Sailo pawhin thu sawiin, Robert Romawia ban a nihna turin document an nei tha tawk niin a sawi a. Robert Romawia’n dan a bawhchhiatnate sawiin, Minister of State a nihna chu hmang dik lovah te, a chhung te leh a laina hnaite inhaivurna atana hna thawkah te a puh.
Heng te avang hian Section 9A of the Representation of People’s Act, 1951 chu Robert Romawia’n a bawhchhia nia sawiin, Election affidavit-ah pawh ziahlan loh engemawzat a neih avangin false affidavit case, section 125 of the Representation of People’s Act, 1951 (False Affidavit) pawh awrh ngei tura an ngaih thu SL Ngursailova chuan a sawi a. Robert Romawia chungchanga Larsap hnena lehkha an thehluh chungchangah Larsap pawhin dan lam thiamte a koh khawm thu leh Election Commission of India ngaihdan a zawh mek a nih thu SL Ngursailova chuan a sawi bawk.
ZPM party mi leh sa pungkhawm te chuan resolution siamin, June ni 17, 2022 a NECS leh Mizoram sorkar, District Council & Minority Affairs department ten Single resource selection hmanga Deed of Agreement an lo signed hi a bik taka mipui emaw midang tute emaw inrawlh ve theih loh tura lo inlakbingna hian The Mizoram Transparency-in Public Procurement Rules 2020 a kalh tih leh dan a bawhchhiatna hi an pal zam thei lo tih sawiin, huaisen takin dan ang taka Larsap-in a ban theih nan ECI hian dan a bawhchhiatna chu an tilangngam turah an ngei tih leh Larsap hnenah chhanna pawh an thawn thuai an beisei tih an tarlang.
Dikna duha punkhawm ZPM mipuite chu ‘Minister sumdawng Robert Romawia bang rawh se’ tihte, ‘Larsap hnena an thu theh luh chungchangah hmalakna awm thuai se’ an duh thu leh au hla dangte hmangin an au rual a ni.