Pakistan ram chhungah France mi leh sate huatna a nasat chhoh zel avangin France sorkar chuan an mi leh sate chu Pakistan ram chhuahsan rih turin a ngen.
Chawlhkar khat dawn chu Pakistan ramah hian nawrhna huaihawttute leh police-te innawrna vangin police pahnihin nunna an chân tawh.
Buaina chhuah chhan hi thla hmasa khan France sorkarin Prophet Muhammad-a cartoon chhuah an remtihna Pakistan mipuiten an dodal vang a ni.
Tun kar tir khan France sorkar hmalakna duh loh avanga lungawi lohna lantirtu zinga an hotupa chu police-ten an man avangin buaina hi a punlun.
Muslim sakhua zawmtute chuan an Prophet lem chi reng reng hman hi anchhelawhnaah an ngai.
Nikum October thla khan Paris khawpui daia school pakhatah French zirtirtu, Samuel Paty chuan freedom of expression class a neih tumin Prophet Muhammad-a lemziak chu naupangte bulah a hmuhtir a. Hemi avang hian Muslim sakhaw vuantu kum 18 miin Paty-a lu hi a tansak.
He pawikhawihna a thlen hnu hian France President Emmanuel Macron chuan French history zirtirtupa uina thu a sawi avang hian France leh Pakistan inkar a chhe lehzual a. Muslim ram hrang hrangin an duh lohzia leh lungawi lohna an lantir nghe nghe.
Hengte avang hian Ningani khan Imran Khan-a kaihhruai Pakistan sorkar chuan nimin atana social media zawng zawng hman a khap a, Facebook, Twitter, WhatsApp leh Instagram an tel.
Pakistan Telecommunication Authority (PTA) chu heng social media website-te leh apps-te hi darkar eng emaw zat khap rih turin hriattir an ni a. An rama tlai dar 3:00 thleng a awh ang.
Nikum khan Khan-a kaihhruai sorkar hian social media chungchangah dan thar khauh tak a lo siam tawh a, “Removal & Blocking Unlawful Online Content (Procedure, Oversight & Safeguards) Rules 2020 chu Prevention of Electronic Crime Act 2016 hnuaiah an siam.
He dan tharah hnuaiah hian an sakhuana, an nunphung, hnam chungchang, an rinna, kumtlinglo laka hleilenna, an ram venhimna leh mipuite kawng dik lova kaihruai thei tur laka invenna tur atana siam a ni.