Tunisia vaukamah, Mediterranean tuipui kana Italian thliarkar, Lampedusa thlen tum lawng chesualah a chuang mi 21 vel an thi.
“Sfax atanga Ningani zan tlai tawh taka lawngleng chhuak hi a chesual a, coastguard-ten ruang 21 an chhar tawh a, mi dang an zawng zui mek zel,” tiin Tunisia-a civil protection service director Mouard Mechri chuan Reuters news agency hnenah a sawi.
Tunisian lawngchawlhna khawpui, Sfax hi tunah chuan Africa leh Middle East ram buai leh retheihna tlanchhiatsan tumtu, Europe khawmualpuia khawsak nawm zawkna beiseia chhuakte chawlh luhna remchang ber a ni mek.
Thla hmasa pawh khan Sfax vaukamah hian ram danga pem tum chuanna lawng chesualin mi 39 lai an thi tawh bawk a. Nikum June thlaah pawh khan inhlawhfa chuanna lawng pilah 60 vel an thi tawh bawk.
Pem tumte hian lawng pangngai vak lo an hmang thin a, zangkhan tak tak a ni thin a. An lawng hmante hi a hlui thin hle bawk a. A chuang an tam thei si a, chetsualna an tawk hma em em a ni.
Africa leh Middle East ram buai avanga nunau rethei tak takte hian an harsatna tlanchhiatsan tumin mi sang tam tak an thawk chhuak a. Chesual an tam tawh hle.
Kum 2014 atanga chhiar tan khan Africa atanga Europe pana tlanchhiat tum mi 20,000 chuang zet tuipuiah an thi tawh.
International Organization for Migration pawhin kuminah ringawt pawh hian Mediterranean tuipuiah hian hetianga pem tum mi 406 vel an thi tawh niin an sawi.
Kumin kum tir atang khan raltlan leh pem mi 8,500 chuangin Italy an thleng tawh a. Italian interior ministry-in a chhinchhiah dan chuan heng zingah hian Tunisian an tam ber.