Damdawi thiamte fimkhur lohna lian tak thlengin rawlthar kum 17-a upa, Manipur-a Thoubal district-a mi chu Regional Institute of Medical Sciences (RIMS) doctor-ten a thi tih an puan hnuah vui a nih hma lawkin a lo harh leh.
Elangbam Ningthem-a fapa, Elangbam Mocha hi Heirok Part-II khuaa cheng niin Ningani khan a inhliam a, ram hnuaiah ramsain a tina niin a chhungte chuan an sawi.
A puma a hliamna chu a nat zual zel avangin Heirok Community Health Centre (CHC)-ah kapui a ni a. He ta tang hian Thoubal district hospital panpui tura tih leh niin anni pawh hian RIMS Imphal lamah an kaltir zui leh bawk.
Mocha hi RIMS ICU ward-ah dah luh niin Ningani chawhma dar 10:30 khan a thi tih puan zui a ni.
RIMS-in death certificate an tihchhuahah chuan Mocha hi a puma hliam avangin, ‘hypovolemic shock’ vanga thi niin an ziak tih Indian Express chuan a tar lang.
A chhungte pakhat, Mangangcha chuan, “Mocha hi a thisen kal a that theih nan a thisen khal paiha zai tenau a ngai tih an sawi a. Hmanhmawh takin kan tlan a, doctor-te chuan a thi tih min hrilh,” a ti.
Mocha hi an chenna ina vui tura buatsaih nghal a ni a. A chhungte pawh an inko khawm vek tawh a; mahse, a taksa a rawn che leh ta a ni.
Mangangcha chuan vui tuma an inbuatsaih mek laiin a taka chu a rawn lum tha leh niin a sawi.
A chhungte hian CHC-a nurse ko vatin a endik chuan a marphu a hmu leh ta a. Thoubal district hospital-ah kalpui leh niin anni hian Imphal an lo pantir leh.
District hospital-a doctor chuan damlo hi a dinhmun a hniam leh a; mahse, a mar a awm niin a sawi a. “A mar a phu a, blood pressure a nei,” a ti a. Nikhua erawh a hre lo niin a sawi.
“District hospital-ah chuan ICU kan nei lo va, Imphal-a kan kaltir a ngai a ni,” tiin doctor chuan a sawi.
Imphal damdawi in an thlen erawh chuan a thi tih an lo sawi leh tho a ni.