Aizawl : Mizorama Bru awm te’n an hnam ni pawimawh an hmanah Chief Minister Zoramthanga chuan khuallian niin a hmanpui a, hmasawnna hna thawh piah lamah mahni hnam ziarang chhawn nun zel a pawimawh thu a sawi.
Inrinni khan Bru Boisu Wai 2-na chu Vaivakawn venga Cultural Centre-cum-Auditorium ah hman a ni a. Khuallian chief minister chuan Mizoram chu state lian lo te, hmasawnna hnathawhna tur sum pawh state lian zawkte nen khaikhin chuan a tam tawk loh viau rualin, sorkar laipuiah project siamin hmasawnna hna thawhna tur haichhuah tur tam tak a awm thu a sawi.
Chief minister hian hnam tenau zawkte chhawmdawla chawisan chu sorkar laipui pawhin a ngaihpawimawh thu sawiin, Bru community te pawhin an hmasawnna tur mamawh an neih angte chu project siamin sorkar laipuiah a kaihhnawih department te kaltlangin bawhzui a nih tur thu a sawi a. Mizorama Bru zirlaite awmna tur hostel sakna tur an dil chu sorkarin a ngaihtuahpui tur thu a sawi a. Hmasawnna hna thawh piah lamah mahni hnam nunphung chhawmnun zel a pawimawh thu a sawi bawk.
Bru Boisu hmanaah hian Bru hnam lam hrang hrangte entir a ni.