Sorkar sikul tam tak zirlai nei mang lova an lo awm tawh thin laiin Govt. Rev Thianga Primary School-ah erawh an hmunhmain a zawh loh khawp zirlai admit an ni a, sorkar sikul dangte pawh hetiang hi awm mah se, an tam lo thung.
Kum ruk vel kaltaah kha chuan he sikulah hian zirlai lut an tlem avangin khar hial ngai tura ngaih a ni hman a. Kum 2023-24 academic session tharah erawh zirlai 162 an admit a, hei hi an sikul hmunhma zawh tawk aia tam a ni.
He sikul hi The Zozam Times-in a tlawh a, sikul ban hun nghaka zirlai hruai tur nu leh pate a kawm kual a. Bethlehem Vengthlanga awm, Govt. Rev Thianga Primary School hi private sikul aiin an duh zawk tih an sawi.
Nu pakhat chuan, a fanu chu an venga private sikulah an kaltir thin a, tuna an luhtirna tak hi a tha a tih em avangin a sawn ta a, an inchhir lo hle tih a sawi a, “Kan beisei ang chiah a ni, an zirtirtute an tang bawk a, ‘Mi dang pawh luhtir ve rawh u,’ kan ti hial,” a ti.
Zirlai nu leh pate chuan he sikul thatna chhan nia an sawi ber chu an headmistress a ni a, a awm hnua tha chho ta hle niin an sawi.
He sikula an hotunu ber, headmistress chu Rochami a ni a, zirtirtu hnathawk tha chawimawina, State Teachers Award pawh a lo dawng tawh.
A enkawl sikul chu miten an fate luhna tlakah ngai se a duh avangin theihtawp a chhuah thu The Zozam Times-in a kawmnaah a sawi a, Bethlehem Vengthlanga cheng tho a nih avangin sikul a enkawl tirh hian an thenawm hnaite chu an fate luhtir turin a sawm thin tih a sawi.
Kumin bikah hian zirlai 162 an neih thu a sawi a, hei aia tam fe hi an sikula lut tur an awm a; mahse, an hmunhmain a zawh ngang loh avangin hrehawm ti takin zirlai thenkhat chu an hnar a ngaih phah ta tih a sawi.
Sorkar sikulah te hian zirtirtu indaih lohna a nasa thin a, Govt. Rev Thianga Primary School-ah pawh regular teacher chu mi paruk bawr vel chauh an ni a. An headmistress hian a hlawh atangin zirtirtu pahnih a ruai mek a, zirtirtu dangte pawhin inthawhkhawmin zirtirtu pakhat an ruai tel bawk.
An sikul zirna that chhan hi ama thawhrah chauh ni loin thawktute inpek tlanna, an thawhhona rah chhuah a nih thu a sawi a, “Zirtirtute hian naupang hi an hmangaih em a, lehkha an thiam loh hi an hlau a, an tang em bawk a, hei vang hian kan sikul hian fakte pawh a hlawh phah,” a ti.