Aizawl: Awithangpa Group YMA-in Kawnpui leh Bualpui inkara quarry neitute chu kawngpui (National Highway) atanga an quarry panna tur kawng an siamin tuiluankawr (sidedrain) a hnawh avangin rang taka tifai turin an hriattir.
Inrinni khan Awithangpa Group YMA hruaitute chuan quarry-te chu tlawhin a neitute chu tuiluankawrte thian fai turin an hriattir a, an ngenna chu an zawm duh lo a nih chuan a tul anga hma an lak tur thu an hrilh a ni.
Awithangpa Group YMA hruaitute chuan Kawnpui leh Bualpui inkara lung quarry neituten tuiluankawr an hnawh avang hian kawngpuiah tuihawk a luang lut a, chu chuan chirh diak leh nal a siam a, kawngpui chhuat a tichhe thuai zel tih an sawi a, “Hei vang hian kum rei tak chhung helai chhehvel kawng hi chhe takin a awm tawh thin,” an ti.
Hemi chungchangah hian YMA chuan group conference-ah palaiten lungrual takin hmalak an rel a; kawngpui siamtute pawh rang taka kawngpui black top thuai turin an ngen dawn tih an sawi.
Group YMA hmalakna hriain Inrinni zan khan Kolasib Bawrhsap John LT Sanga chuan, “Quarry kawng tuiluankawr hi then faitir an ni tawh thin a; tun hnaiah a hnawh leh tak avang hian rang takin order thar tihchhuah a ni ang,” a ti.
Kawnpui SDO (C) Cheemala Siva Gopal Reddy pawhin YMA hmalakna chu tha tiin, a theih anga bawhzui nghal a tum niin a sawi a. Nimin khan bialtu MLA K Laldawngliana’n Group YMA hruaitute biain theihtawp chhuahpui a tum thu a hrilh bawk.