Tun kartawp atangin NBA Playoffs khelh tan a ni a. Champion lai Golden State Warriors chu Western Conference Playoffs first round series-ah Sacramento Kings lakah an tlawm nghal.
Pathianni zingah Sacramento a Golden 1 Center a inkhelah 126-123 in Kings hian hnehna an chang. Kings hi team naupang tha rual tak an ni a, kuminah West-ah seeded number three changtu an ni.
An star player De’Aaron Fox chuan point 38 score in heng zinga 28 hi quarter hnuhnung berah a ni a, hnehna an chan chhan lian tak a ni.
Malik Monk chuan bench atangin point 32 a thawh ve bawk a. Domantas Sabonis chu Warriors tawnhriat nei tha lakah an defense hmanraw lian niin point 12 a score bakah rebound 16 a la.
Sacramento hian kum 17 chhunga a vawikhatna atana Playoffs an khelhna a ni a, an khaw mipuite phur hle in mipui 17,600 lenna stadium-ah mipui 18,000 chuang an kal khawm.
Fox chuan, “Kan fans te tan a ni. He team hi a nuam leh hreawmah an thlawp tlat a, tunhnaiah hun harsa tak tak min tawrhpui hnem hle.” tiin an chak hnuah a sawi.
Inkhel dangah East lama rinkai Boston Celtics in 112-99 in Atlanta Hawks an hneh a. Celtics tan Jaylen Brown chuan point 29 a score.
Philadelphia 76ers in Brooklyn Nets an hneh bawk a. James Harden leh Joel Embiid ten point 23 leh 26 an score.