Aizawl : Chakma Autonomous District Council (CADC) BJP President Dr BD Chakma, MLA chuan MNF sorkarin BJP len a hlauh avangin DoNER Minister programme thulh theihna tur an dap niin a sawi.
Nimina BJP State office ‘Mipui Run’ a inkhawmah thu sawiin BJP MLA Dr BD Chakma chuan, Silsuri khuaa DoNER minister BL Verma-a’n Bizu Festival hman pui tura ruahmanna awm chu, khawthlang tana hmasawnna hrang hrang a thlen theihna tura Mizoram sorkarin a tih theih loh, a bikin Pukzing leh Silsuri kawng siamna tur hi DoNER minister hnena kan thlen tawh chu puan chhuah tir an tum chu, MNF sorkarin BJP len an hlauh avangin minister programme thulh theihna tur an dap niin a sawi.
Dr BD Chakma chuan, “MNF sorkarin DoNER Minister programme thulh theihna tur an dap ta mai hi hriatthiam a har hle a, Minority-te leh thingtlang mite hmasawnna tur do tlat tu sorkar kan nei hi a pawi hle a, hei hi khawthlang tlang dung te’n an hriat chhuah hunah an thin a rim hle dawn a ni,” a ti.
Inkhawmah hian Mizoram tana hmasawnna thlenna tur sawihona hun buatsaih niin, BJP Mizoram State President Vanlalhmuaka’n a kai hruai a. He hunah hian kumin MLA inthlanpui atana BJP manifesto tur an lo duan sa tawhte chu belh ngaite belhin, manifesto hi hun remchangah an ennawn leh turin an dah a ni.