Aizawl: Trained Nurses Association of India (TNAI) National President Prof Dr Roy K George leh hruaitu dangten TNAI Mizoram Branch tlawhin Mizoramah an zin.
TNAI hruaitute hian April 15 khan Mizoram thlengin TNAI Mizoram Branch-in Lungmual ram chhunga ram a lei turte an enpui bakah tlai lamah Hotel Floria, Dawrpui-ah thukhawmin, tul leh pawimawh dangte an ti a. He thutkhawmah hian TNAI, Mizoram Branch President Lalremmawii’n thu a sawi bakah Secretary Lalrinhlui’n kum thum kalta chhunga an pawl hmalakna hrang hrang a sawi a. TNAI National Leader te hian thu an sawi bawk.
TNAI hi kum 1908-a din niin ram pumah member nuai thum chuang an awm mek a. Mizoram State Branch-ah member 3,356 an awm mek a. Nursing course zir chhuak tawh phawt chu membership fee pein member an ni thei a ni.
TNAI hian nurse-te tihhmasawnna tur atan hma a la thin a, workshop, conference leh training te a buatsaih thin a, nurse zirlaite tan scholarship a ruahman a, railway concession, medical assistance hrang hrangte pawh a ruahman thin bawk a ni.