Pathianni tlai khan Consulate General of the United States of America, Kolkata, Melinda Pavek leh a thawhpuiten Central YMA hruaitute an kawm.
Central YMA pisa-a an inkawmnaah hian Pavek leh a thawhpuite chu Central YMA Vice President Lalhmachhuana hovin General Secretary Prof. Lalnuntluanga leh Asst. Secretary Prof. Malsawmliana bakah CEC thenkhatten an lo dawngsawng.
He inkawm hi Lalhmachhuana’n kaihruaiin, General Secretary Prof Lalnuntluanga’n Mizoram leh hnam tana YMA hnathawh hrang hrangte a lo hrilhfiah a. Pavek-i chuan YMA hnathawh leh an pawl inkaihhruaina chu ropui a tih thu a sawi a. Mizo thalaite leh US thalaite kawng hrang hranga thawhho dan tur a lo ngaihtuah tur thu leh ei leh bar zawn a kawnga inzirtirna tha neih chu a ngaihpawimawh thute a sawi a. India mite tana US Mission hrang hrangte chu YMA hruaitute hnenah hian a hrilhfiah a ni.
Pavek-i hian International Youth Leader Exchange programme hnuaiah YMA hruaitute nena thawh ho theihna a awm thu leh tun hma pawhin YMA hruaitu mi pathumte chu US-ah leadership training an lo neihpui tawh chu chhunzawm dan turte pawh a sawipui a ni.
Central YMA hruaitute chuan US Consul General hi YMA inkhawmpui lian, October 24-26, 2023-a Biate khuaa neih turah tel ve turin an sawm zui nghal a, ani pawhin a hman phawt chuan US thalai mi thiam tak takte nen tel ngei a duh thu a sawi.