La Liga-ah hmahruaitu Barcelona in hnehna an chang thei lova, Getafe nen goal inpe lovin an inhnehtawk.
Pathianni zana Coliseum Alfonso Pérez-ah hian first half-ah goal khung theihna remchang tha tak vawi hnih inhnaih takin an nei a. Raphinha leh Alejandro Balde ten goal ban an pet per ve ve.
Getafe tlarhnung thiah erawh an harsat thin a, an theih chhunah a hmawr an bawk tha thin lo.
Barcelona hi a zawna match thum goal an khung lohna a ni a. Point hnih hloh mahse league match 9 la awm ah Real Madrid lakah point 11 in hma an la hruai.
Barcelona tan second half-ah Raphinha bawkin chance tha a nei a, mahse Getafe keeper David Soria chuan a lo dansak.
Barca hian Sergi Roberto chu inhliam avangin an chan bawk a, a chawlh rei zawng tur erawh hriat a ni lo.
Coach Xavi Hernandez chuan, “Tun season a kan khelhthat lai ang kha kan ni rih lova, tunhnaiah kan result-ah pawh a lang. Kan tum viau a, mahse tihsual kan ngah thin. League-ah kan dinhmun la tha mahse kan mutthluk a thiang lo.” tiin a sawi.
Barcelona hian karlehah Atletico Madrid an mikhual a. Rojiblancos in Antoine Griezmann khung hmangin Almeria an hneh a, a zawna vawi ruk nan league inkhelah an chak tawh.