Netherlands Football Federation (KNVB) leh Mizoram Football Association buatsaih football coach zirna tur, WorldCoaches programme chu Thawhtanni khan hawn a ni a, Netherlands player leh coach hmingthang Johan Neeskens chu Chief Instructor a ni.
MFA Honorary Secretary Lalnghinglova Hmar chuan Emerald Hotel-a neih a hawnna inkhawmva kaihruai a, MFA-in a beisei phak loh programme tha tak a thleng thei chu lawmawm a tih thu a sawi a. MFA Golden Jubilee Project pakhat a nih thu a sawi bakah coach lo kal khawmte chu tih tak takna nen theihtawp chhuah turin a hrilh.
Neeskens chuan Mizoram chu la hmelhriat ngai lo mahse nuam a tih thu te, an châm chhunga coach-te nen thil tam tak an zir hman a beisei thute a sawi a, football hmasawnna tura khawvel hmun hrang hranga Netherlands an inzarh pharh dante leh football khawvela a tawnhriat hrang hrangte a sawi.
KNVB official Johan van Geijn pawhin thusawiin KNVB-in khawvel ram hrang hranga hna a thawh dante a sawi a, Mizoram nuam a tih thu leh MFA nena hun rei zawk inkawp chhoh zel a duh thute a sawi bawk.
WorldCoaches hi KNVB hnuaia an zirna programme pakhat a ni a, football coaching piah lamah khawtlang tana tangkai zawka football-in hna a thawh theih dante an zir tel ang.
Hawnna hunah hian MFA hruaitute bakah press mi ṭhenkhat an tel a, press conference neih zui a ni bawk.
He football coach zirna hi Lammualah neih a ni ṭhin dâwn a, April 21 thleng a awh ang.