Aizawl : Centre for Environment and Social Justice (CESJ) chuan NHIDCL hnuaia kawngpui laih mekin ram leilung, sik leh sain nasa taka a tawrh mek avang leh hnathawh dan dik lo leh phuailuai tak hi dodal turin Mizo mipuite an sawm.
Inrinni khan CESJ chuan Thingsul Tlangnuam leh Keifang-a NHIDCL lei laih vungin Tuirini leh Kaihzawl lui/Zawlzaua leilet bakah, lo leh nul a tihchhiatte, Keifang-ah sangha dil eng emaw zat a tihchhiatte an enfiah a. Heng leilet, sangha dil leh nul neitu chhungkaw sawmli paruk (46) te hi kan kawm a ni.
An harsatna tawh hi NHIDCL leh CALA hnenah an thlen tawh chunga vawiin thlengin ngaih pawimawh an hlawh lo a. He’ng lo neitu, zangnadawmna cheng khat mah la lote hi theihtawpa puih an tum thu an sawi.
CESJ chuan NHIDCL office Thingsulthliah, Tourist Lodge-ah General Manager (Project), PMU Seling kawm nghal bawkin, NH-06 (Seling – Champhaiah)-ah hian leivung paihna Spoil Bank mumal a awm lo a, kawng laih vung chu kawng tlangah nawr liam vek a, hei vang hian lui kam ram thaa lo nghet neitute tan harsatna a siam thu an hrilh chu, NHIDCL hotute’n an zawhna te chhan pial zel avang leh peh helna tur an zawn avangin an inhnial buai hman viau niin an sawi.
NHIDCL hian Mizoram chhunga national highway hrang hrang siam leh laih hna an thawh zawng zawngah environment dan leh hrai zawm miah lo a, a ram leilung fate pawh zahna chhete mah nei loa an tihsual thup an tum leh dik taka thil an tih duh loh avanga lo neitute thlenga an tuar zel hi an dem tih sawiin, ram leilung, sik leh sain nasa taka a tawrh mek lai leh nakin zela a tawrh zual zel dawn avangin NHIDCL hnathawh dan dik lo leh phuailuai tak hi dodal turin Mizo mipuite an sawm.