Liverpool in an ‘zia’ an chhuah leh a. Tun season-ah chak tluang hleithei lo mahse a khat tawka an khingpuite laka an goal khung leh teuh thin chu Thawhtanni zanah an thlen tir leh a, Leeds United 6-1 in an sawp.
Liverpool hian Premier League match hnuhnung panga atanga vawikhat hnehna an channa a ni a. March thla a Manchester United an sawp hnua an chak leh hmasak ber a ni.
Hetihlai hian Javi Gracia hnuaia insiamthat tum mek Leeds United hi mahni mualah a zawna an tlawmna a ni a. Relegation zone an la hlat thei lo.
Reds an inlar leh e
Elland Road a inkhelah hian Liverpool in an that vanglaia an football ang an khel a. First half atangin team tha zawk niin ball thunun leh umna kawngah pawh an tha zawk.
Minute 35-naah Trent Alexander-Arnold chuan a ban hmangin ball a tawk niin lang mahse ham a ni lova, Mohamed Salah nen tlarhnung thiatin Cody Gakpo goal khung tur a siamsak.
Salah hian an goal hnihna khung ve nghal vatin halftime-ah an dinhmun a tha viau.
Halftime zawhah erawh Leeds United in beiseina an neihna turin Luis Sinisterra chuan goal mawi a khung a. Liverpool tlarhnung an chesual.
Mahse Reds in an chhanglet har lo. Nikum April hnua a goal hmasa ber ni tur Diogo Jota chuan a khung hnuah goal pawmsak loh khung tawh Salah chuan a goal hnihna a khung a. Jota pawhin a goal hnihna khung lehin huntawp hma in Darwin Nunez chuan an goal hnuhnung ber a khung.
Liverpool manager Jurgen Klopp chuan, “Kan inkhel a lungawithlak hle. Tihsual an neih hnem nan kan bawr buai tha hle a, goal mawi tak tak kan khung. Kan nawrlet leh ball an chan a kan bawr zui vat zel dan kha a tha hle a, khang anga tha khan kan ti zen zen lo.”
“Ka duh lai ber chu minute 92-naah pawh Leeds player in ball a chanin lainatawm lek lek zawk tur khawpin kan player pali in an bawr zui nghal. Kawng tam takin tun season a kan khelh that ber niin ka hria.” a ti.