- Reuben Lalnunthara Hnamte
Khawvelah hian khawi ram khawpui mai pawh hi a tawt em em vek emaw tih tur a ni a. Eizawnnate, changkan zawknate beiseiin sum tamna lam ni a kan hriat khawpui lam hi nitinin kan bawh ruih ruih mai a. Kan Aizawl khawpui ngei pawh hi mi hmasate khan hetiang taka khawpui thang chho tur leh lian tur a ni ang tih an hmuphak chiah lo nge ni dawn ni? Vantlang kawngpui zuah zau lo zawngin in kan sa a, hmanlai deuh phei kha chuan a thei thei leh thiltithei deuhte chuan an ang angin in an sa emaw tih mai tur a ni a. Kawngpui hnaih tak takah in kan sa a, boruak lama duham taka han nek talh lah hmuh tur a awm nawk bawk a. Tlai khaw hnuah AMC te kan han nei ve leh hnuhnawh a, tan an han la viau a, in sa thar turah chuan dan fel tak te siamin hma an la a, a sawt pawh a sawt khawp mai. Mahse, a bilh tho tawh lo zawng, siamthat harsa fe fe in alo khat hmuk tawh a, han tihzau leh ngaihna awm lo khawp hmun hian kan khat hnuk tawh a ni.
Lirthei lah a ni telin a pung zel a, lirthei chhuak that inneih siakin kan lei chur chur reng bawk. Lirthei chhuakthar inneih siak reng reng hian kan intlansiak emaw tih tur a ni a. Ram changkangah zawkah chuan miin ke a kal te, public transaport hmante an uar em em tawh laiin, keini zawng changkanna anga ngaiin ram changkang tih duh tawh loh lam kan tithar ve tan emaw tih tur a ni a. Sap ho khualzin lo kalte hi han chik mah ula, lotheihloh a nih loh chuan bag rit tak tak ak hian ke in an kal fur fur mai a ni. Kan naupan lai leh tlangval tantirhte kha chuan Town Bus lianpui chi kha a tlan thin a, motor ala tam loh vang leh in ala tam loh vang te pawh a ni anga, a hnawksak lem lo, tichuan khawpui a lo thang zel a, In sa thar ho lahin kawngpui hnaih taktakah in an sa a, lirthei alo pung bawk a, Bus te zawk te an han service ve leh ta. Khawpui tawt tur lam ngaihtuah duh lo hian Vote zawn nan leh duhsak zawng tih lawm nan kan hmang nge, khawpui zawh loh khawp permit kan in pe a. Tunah pawh hian City Bus te leh zual te hi service tir tawh mai hi kan khawpui tan chuan a hun viau tawh a ni.
Kan khawpui zawh loh khawp hian City Bus, Taxi Car, Two wheeler taxi te hi kan ngah tawh a ni. Heng kan induhsaknate hi ram hmangaihtu an ni thei angem tih chu ngaihtuah tham tak a ni. Ringtu tam, ber inchhalna ram si ah hian kan inrelbawl dan ngaihtuah hi chuan Pathian hi kan hlau lo va, ram lah kan hmangaih hek lo niberin a lang. Ram inpek thuah tam zia te, mi ramchhung ngei pawh a ti thei deuh chuan an chhuhsak thei deuh tlat thin zu nia. Kan ram inrelbawlna, kan rilru puthmangte hi a chhe lulai lutuk hi ngaihtuah peih tan chuan muthmawh hnar mawh neih tham a ni. Sum leh pai thianghlim lo lengvel tamziate, a nei chuan an nei em em mai a, a nei lo chuan a nei lo em em bawk. Mi rethei deuh leh incheina nei lo deuh tan chuan kohhrana tlaktlum pawh thil har tak a ni tawh. Kohhrana leh khawtlangahte tlatlum tur leh hriat hlawh tur chuan a nei deuh nih te a lo ngai a, mi rethei rahbehna hi kan ramah ngei pawh hian a thleng tan ta em ni tih hial tur a ni. Mi rethei thlaurau mi deuh ai chuan mi neinung deuh thlarau vak lem lo pawh ni se sum lam a thawh tam deuh theih miau avangin a tangkai zawk bawk a lawm le.
LPS Special report han thlir thin te hian kan bawlhhl;awh paih te hian kan khawpui a tihchhiat tawh ziate kan hmu a. Danin a phal loh tilui talh duh, ‘mahniin kan hlawkpui chuan midang chuan tuar rawh se’ ti niawm tak kan kat ta nawk mai zawng a nih hi. Dan bawhchhiate hrem mumal a awm lo hi kan inthlahdah phah ni berin a lang. Dan bawhchhiate hi thlei bik awm lo hian hremna hi nah le mai se la awmzia chu a awm mahna. CCTV leh security te pawh hi khawpui chhung leh a chhevelah hian tun aia tam dah a ngai tawh a ni. Kan khawpui hi a thang zel dawn a, kan pung tulh tulh dawn bawk. Dan hi lalber mai se la, mipuite dan hi zahthiam ila; chu chu kan khawpui tawt lutuk leh bawlhhlawh lutuk thenfaina kawngah a tangkai viau ang. Ram changkangah chuan Dan hi an dah lal em em a, mi hausa, milian te pawh dan an bawhchhiat chuan an hrem hmak hmak ngam thin a nih hi. Hmanlai ka pi leh put e hunlaia lal kan neih lai kha, khawtlang inkaihruaina kha a tha thin hle. Khawpui lian deuhah pawh dan bawhchhe ngam an awm lo tih theih a ni. Dan bawhchhiate an dim lo va, an hremna pawh a na thei hle a nih kha. Khanglai huna mizo klhawtlang nun kha a mawi em em a ni. Achang chuan Democacy hi mizote hian kan hmang thiam ve lo em ni ang ka ti rum rum. Dan bawhchhiate chu thleibik awm lovin na taka hrem nisela kan la ziaawm mahna. Christian ram, ringtu tamna ram ti a in en ngawt chi pawh kan ni tawh lo. Ringlo mi te aia duham leh sual hi kan tam ta em mai.
Kan khawpui bawlhhlawh leh tawt lutuk te, boruak thiangh;lim lo leh lum ta lutukte hi a ziaawm theih nan I tangrual teh ang u. Mahni chhungkua leh eizawnna lam ngawt thlir lovin, kan khawpui hi hmangaih ila, a siamtha theitu chu keini tho hi kan ni. Ram changkang angin AMC neiin, Mayorte hial kan lo nei ve tawh a. Kan AMC te pawhin thahnemngai takin khawpui thanna tur leh thianghlim nan an thawk a. Mipuite hian dan kan zawm a, khawpui thanna tur leh thianghlimna tura thuawih taka dan kan zawm hi kan tih tur a ni. Isua hian kan thlarau ringawt hi a chhandam a ni lo va; kan taksa leh rilru thlengin min chhandam a ni. Khawvel hi hlim leh nuamtaka kan khawsakna tura min buatsaih sak a ni a. Ram inrelbawlna leh khawtlang inrelbawlna thleng hian Pathian hian a dah pawimawh em em a, kan Bibleah pawh ram inrelbawlna tha leh khawtlang inkaihhruaina tha hi a sawi tam hle. Ram hruaitute thuawih hi mipuiten kan chanvo a ni a, dan ang taka hruaitu te’n thupek an siam zawm lohna hi Pathian pawisaklohna pawh a ni tih hriat a pawimawh hle. Kan khawpui bawlhhlawh leh tawt hian kan environment pawh a tichhe nasa ta a, khawlum lutuk leh boruak bawlhhlawh avanga harsatna hi kan ;la tawk dawn chauh niin a lang. Chu mi tiziawm tur chuan mipuite hian dan zawm that leh thuawih taka, kan ram khawpui hi kan hmangaih a pawimawh a ni.