Oil & Natural Gas Corporation (ONGC)-a hna thawk mi pathum chu tute nge an nih hriat loten Assam chuan chung lam, Sivasagar district-a Lakwa-a an hna thawhna, RIG site atangin nimin tuk khan an ru bo.
Police chuan he thil titute hi ULFA (I) hel pawl an nih an ring.
Ruk bote hi junior engineer Alakesh Saikia leh junior technician Mohini Mohan Gogoi leh Ritul Saikia te an ni.
“Heng ruk bote hi ONGC lirthei hmanga an thawh chhuahna atangin lirthei nen ruk bo an ni a. An lirthei hi Nimonagarh ram hnuai, Assam-Nagaland inrina bulah hmuh a ni,” tiin ONGC thuchhuah chuan a tar lang.
ONGC hian an hnathawk bote chungchangah hian tual chhung police hnenah lehkha an thehlut nghal a. Assam Police-a hotu lawk tak takte pawhin a hmun hi an thleng zui nghal bawk.
Tual chhung thuneitute pawhin he thil thleng hi thuneitu sang zawkah an thlen a, ONGC pawhin an bepawp bawk.
December 21, 2020 khan ULFA (I) hel pawl hian Quippo hnathawk mi pahnih chu Changlang, Arunachal Pradesh atangin an lo ru bo tawh a, thla thum zet an kawl hnuah an chhuah.
“Kan chhui nghal mek a, tunah rih chuan engmah sawi theih kan nei lo. ULFA(I) tih a nih kan la ring ringawt a ni,” tiin police hotu sang pakhat chuan a sawi.
Thawktu an ruk bona hi ONGC ambulance a ni a, AS-20-2186 a ni.
Lakwa police outpost-ah thubuai ziah luh a ni a. Sivasagar district pumah mi bote chhui zui hna hi thawh nghal a ni a. Sivasagar-a ONGC pisa pawh venhimna khauh zawk pek a ni bawk.