Aizawl: Ningani zan zanlaia ruah leh thli thawkin Thenzawl Kanan venga hmeithai, Lalengmawii te chhungkaw chenna in chu an kawmthlang feet 20 vela hlaah a len darh.
Thenzawla Vantawng chanchinbu editor, Liantluanga Renthlei hnen atanga thu dawn danin, Lalengmawii hi a fate nula leh tlangval bakah a tupa naupang kum 11 mi nena khawsa niin, an in hi a chung rangva, a bang dap a ni a. Nizana ruah, rial leh thli thawkah khan an hlauthawng chu an in atang hian an insaseng a, an in atanga an tlanchhuah hnu lawk hian thliin an in hi a la zui nghal a, thi leh hliam an awm lo.
Zirtawpni khan Kanan veng VC leh YMA hmalaknain in sak that hnatlang hi neih nghal niin, in hi nikum hmasaa PMAY in sak tanpuina first instalment an dawn, Rs 60,000 hmangin tuna an chenna thliin a lenchhiat thlangah hian concrete in, in ban tur an rel mek a. An rel mekah a theih ang anga khawrpum tura hnatlan a ni.
Nimina hnatlang leh chhiat tawkte tanpui nan Police Training School Principal H.L. Thangzuala chuan Rs 5,000 pein, hmeithai in sak hnatlangah hian police 70 bakah a tul anga hman tur lirthei a tir.
Hei bakah J Malsawmzuala Vanchhawng-in Rs 5,000, R.Vanlaltluanga’n Rs. 5,000, Presbyterian Kohhran, Kanan Vengin Rs 2,000, Kanan Veng VC-in Rs. 2,000 leh SDO Civil Office Thenzawl-in silpouline pakhat an pe.
Vawiin lamah pawh hnatlang hi chhunzawm tura ruahman a ni.
Thli leh ruah thawk hian Thenzawl Vengthar-a parawl, Lalnunmawia in, mutna pindan chung rangva pathum chu a len thlaksak bawk a. Hei bakah hian Serchhip Bukpui leh Thenzawl inkara electric line chu a chhia a, nimin khan P&E department-in a chhiatna lai zawngin siam that tumin an bei nghal a. He chanchin buatsaih lai thleng hian he line-in a chawm khuaten power supply an nei lo niin thudawnain a sawi.