Aizawl: Rajya Sabha MP, Food Corporation of India (FCI), Mizoram Chairman ni bawk, K Vanlalvena’n sorkar laipuiin Mizorama buh thar atangin minimum support price (MSP) a pe theih tih a sawi.
FCI State Consultative Committee thutkhawm nimina Royale Lalawi Hotel, Aizawla neihah FCI, Mizoram chairman chuan a sawi a. Mizoramin buh a thar tam theih nan buh thar atangin MSP pek theih a nih thu food, civil supplies & consumer affairs ministry leh FCI hotuten an hrilh tih sawiin, he a thu dawn hi Mizoram chief minister pawh a hrilh tawh thu a sawi.
FCI, Mizoram chairman chuan Mizoram mipuiin buhfai tharlam an ei theih nan hma a lak thu sawiin, “FCI hotute ka dawrnaah buhfai her sa ni lo, buhhumin Mizoramah thawn theih ni se, chu chu Mizoramah her ta ila buhfai tharlam kan ei thei dawn tiin rawtna ka thlen a, hemi chungchang hi buhfai kan leina state leh state indawr ngaite a nih avangin chief minister pawh ka hrilh hre tawh,” a ti.
Rawtna a thlen chu la tih ngai loh ni mah se, thil tih theih a nih thu leh sorkar laipui lamin eng angin nge hma an lak dawn tih chu an ngaihchan mek thu K Vanlalvena chuan a sawi.
FCI-in New Capital Complex chhunga regional office hmun an dilna chu a thua pawmsak a nih tawh thu leh lehkha tihfel ngai te erawh tihfel a la nih loh thu pawh K Vanlalvena chuan a sawi bawk.
FCI hotuten an sawi danin Mizorama FCI kudam hrang hrangah buhfai thla li daih, metric tonne 20,034 a awm mek a ni.