Ningani zan dar 8 vel khan Zemabawk, Zokhawsang peng bulah two wheeler taxi driver Lalrammawia (24), Bawngkawn, Aizawl chu a passenger, Lalfakmawia (24), Samlukhai khua nia inchhalin a vit hlum a, pawikhawihtu hi police kuta hlan nghal a ni.
Thudawnnain a sawi danin Lalfakmawia hian two wheeler taxi hi a hmang a, a hman man chu pe mai duh lovin a khalhtu nak-ah a vit ta mai a. An bul hnaia awmten Lalrammawia chu Greenwood Hospital panpui nghal mah se an chhan hman lo.
He thil thleng chungchangah hian Aizawl Two Wheeler Taxi Association (ATTA) chuan thuchhuah siamin two wheeler taxi hmanga an eizawnpui, Lalrammawia’n a passenger kut tuara nunna a chân chu pawi an tih thu an sawi a. Hman man pek tur neih loh avanga an thawhpui nunna laksaktu, Lalfakmawia an dem thu leh dan hmanga a na thei ang bera hrem an phut thu an sawi.
ATTA chuan hetiang thil râpthlâk hi thleng nawn tawh lo se an duh thu sawiin, an eizawnna hmu hniam zawng emaw, inhmuhsitna lam hawi emaw, in risk-na ang chi emaw chu awm tawh lo tûra an duh thu an sawi bawk.