Mizoram Pradesh Congress Committee (MPCC) Treasurer Zodintluanga Ralte-in MPCC President Lalsawta hnenah nimin khan party-a a nihna atanga bânna a thehlut a. President a zin lai a nih avangin Vice President Lal Thanzara’n a lo dawng a ni.
MPCC President hnena bânna a thehluha a tar lan danin Zodintluanga chuan lungrual taka thawkhova MLA inthlanah pawh hnehna chan leh inringa beiseina sang tak a neih laiin a beisei angin thil a kal ta lo niin a sawi.
Indian National Congress (INC) chu committee a inghat, an dan bu-ah pawh party inkhaidiat dan tar lan a nih laiin Lalsawta MPCC President a nih atangin INC inghahna leh kalphungte chu sawinghina sawichhiat a lo ni ta niin a sawi.
Committee-in a rel thinte pawh president-in mi pahnih/khat rawnin thutlukna a siam ta fo nia sawiin, an preident-in collective leadership a lo sawi mawi thin chu a taka hmuh tur a awm ngai ta lo niin a sawi a. Party-a chanvo pawimawh hrang hrang tihdanglam tulte pawh MPCC Executive Committee kaltlanga tih thin a nih laiin Lalsawta president hnuah chuan Lunglei District Congress Committee siam rem te leh Aizawl District Congress Committee siam rem a nih te pawhin committee-a relho a ni ngai ta lo niin a sawi.
Zodintluanga chuan, “Nomination committee din a nih dawn pawhin rawn ka ni lo,” tiin, president-in member a duh ang a ruat hnuah telephone-in a hriattir ve lek chauh niin a sawi a. Tun hnaia member pathum ruat belh an nih chungchangah pawh rawn a nih loh thu leh a hriat ve loh hrim hrim thu a sawi.
An party hotu thenkhat tawngkam a hriat danin Political Affairs Committee chu preident chuan ring zo tawh lovin meeting koh pawh tul a tih tawh loh thu pawh mi eng emaw zah hnenah a sawi niin Zodintluanga chuan a sawi a. Tuna PAC member-te chu tuna president ni lai duhsak taka vice president leh president thlenga hlang kaitu an nih avanga zah leh ngaihpawimawh tur nia a hriat laiin elected OB dangte hriatpui lohvin president-in amah duhsaktu PAC member ni lai mekte chu thiata PAC thar siam a tum tih a hria chu lungchhiatthlak a tih thu a sawi.
Zodintluanga chuan, “Tha zawk nia kan hriat vete ngaih pawimawh a ni lo va, chumi piah lamah party rorelna sang committee-te ngaih pawimawh an ni tawh lo va, chuvang chuan treasurer nihna zahawm tak hian tangkaina leh hlutna engmah a neih tak loh avang leh kan party chak nan leh inpumkhatna atana theihtawp chhuah ve kan lo tumnaten awmzia engmah a neih tak chuan loh avangin treasurer nihna ka chelh zui zel hi a rem tawh lovah ka ngai a, banna ka thehlut ta a ni,” a ti.